Дарко Јаконов
Ванот во моделското семејство на Mercedes A-Class освоил највисоки оцени на тестовите на клубот ADAC лани. B-Class најмногу се издвоил од просекот од вкупно 122 тестирани модели во седумте категории што се оценуваат.
При оценувањето на каросеријата, кабината, комфорот, мотор и возните својства, исто како и безбедноста и грижата за животната средина, за коишто се добиваат двојно повеќе бодови, експертите на клубот ADAC не утврдиле пропусти или недостатоци кај Mercedes B-Class при ланското тестирање. Тоа е автомобилот што освои најмногу бодови и со тоа заслужи највисока оцена од сите 122 автомобили што ги минале строгите тестирања кај најголемиот европски автоклуб.
По Mercedes B-Class следат најразлични возила, меѓу нив лимузината од средната класа BMW 320d, големиот СУВ-модел Mercedes GLE, но и првиот електричен автомобил на Audi, e-tron quattro. Сите овие модели добиле оцена 2,0 на тестот на ADAC. Тоа очигледно се модели од поскапите сегменти, но за висока оцена се изборија и подостапни модели, како VW Golf TGI (на метан), Opel Insignia Sports Tourer (со оцена 2,1), Ford Focus Turnier, Skoda Scala и Toyota Corolla (со оцена 2,2).
Во поглед на противредноста, победата му припадна на VW Polo TGI со погон на метан и со оцена 1,8. Второто место им припадна на Skoda Fabia TSI и VW Golf TGI Blue Motion (метан). Станува збор за возила што постигнуваат најдобар сооднос меѓу техничките квалитети и трошоците, вклучувајќи ја цената на возилото и одржувањето. Сосем е јасно дека победата во оваа категорија им припаѓа на помалите возила, чиишто трошоци за одржување се пониски. Но, експертите на клубот немаат забелешки ниту за техничките својства на овие модели.
Високата цена не мора веднаш да го исклучи возилото од конкуренција. BMW i3, на пример, со цена од 38.000 евра во Германија, исто како и Tesla Model 3, со цена од 45.770 евра на тамошниот пазар, освоиле оцени 2,2, односно 2,3, со што пак се над просекот. Заслугата за тоа, покрај напредниот електричен погон, се ниските оперативни и сервисни трошоци, како и помалиот обем за редовно одржување на овие возила со погон на струја.
