Тобијас Велмер од шпедицијата Гресел од германскиот град Нојштат неодамна го презеде својот Actros Edition 2 во центарот за клиенти во фабриката на Mercedes-Benz во Верт. Тој е сопственик на еден од 400-те примероци од специјалната серија на премиум камионот со сребрената ѕвезда.
Покрај бројните додатоци и преработки на Edition 2 во споредба со стандардниот модел, овој Actros поседува уште бројни опции по избор на Тобијас. Арматурната табла, на пример, обложена е со напа телешка кожа, исто како и воланот. Шефот на шпедицијата за којашто Велмер работи веќе 16 години се сложил за оваа скапа опција.
Предниот дел на Actros Edition 2 целосно е лакиран во боја на месечев камен со металик тон. Тоа исто така е по желба на возачот. Кабината е во варијантата GigaSpace, тоа е најголемата кабина што се нуди за Actros. Тоа е сосем разумен избор, имајќи предвид дека Тобијас обично е на пат цела недела.
За возачот да има целосна комоција, кабината внатре е изведена со комфорна фотелја и масичка место совозачко седиште. Во поглед на моторот исто владее висок стандард. Моторот е линиски шестцилиндарец од 12,8 литри со моќност од 390 kW, односно 530 КС.
Возилата од специјалната серија се разликуваат од стандардната во околу 40 ставки. Пример за тоа се скалилата што се изработени од нерѓосувачки челик. Дури и анимацијата на дисплејот при стартувањето на возилото е посебна за „Edition“.