Најголемиот американски производител на автомобили General Motors закрепнува од корона-шокот побрзо од очекувањата, благодарение на големиот раст во продажбата на СУВ и пикапи.
Заработката на General Motors во третиот квартал е речиси сензационална во актуелните услови. Во споредба со лани, заработката во третиот квартал е за 74 проценти повисока и изнесува 4,0 милијарди долари, односно околу 3,4 милијарди евра.
Прометот е зголемен незначително и достигнал 35,5 милијарди долари (30,4 млрд. евра). Во вториот квартал од годинава, концернот се соочуваше со големи проблеми во продажбата и со прекин во производството поради пандемијата, што донесе големи загуби.
Продажбата во САД и во Кина се враќа побрзо отколку што очекуваа многумина. General Motors профитираше благодарение на големата побарувачка, особено за пикапи и СУВ-модели. Речиси целата заработка е постигната на домашниот пазар. Исклучително ниските камати придонесоа да зајакне и кредитирањето на нови возила. Реагираше и берзата, па вредноста на акциите порасна за околу шест проценти.