GAZelle се вмешува во време кога пазарот бара комбе повеќе

Горковскиј Автомобилниј Завод е во Топ 10 производители на возила во Русија во септември. GAZ во преодниот месец од лето во есен продал 5.199 примероци на домашниот пазар, што е за 16,8% повеќе од истиот месец лани. Голема заслуга за тоа има и новата генерација на GAZelle NN.

Автомобилската индустрија го доживува најбурните години во историјата, коишто се предизвикани од бројни фактори, почнувајќи од пандемијата и преоѓањето од класичен на електричен погон, до недостигот од полупроводници. Од друга страна, онлајн-продажбата и потребата за производите нарачани од домашната фотелја или од работното биро, да се достават до клиентот, услови голем пораст во продажбата на доставни возила.

Секако дека тесното грло во снабдувањето со полупроводници, односно чипови, ги погодува и производителите на товарни возила. Но, во исто време се отвори и шанса за автомобилските компании, на коишто воведувањето на новите и радикално сменети генерации возила им се погоди во овие вонредни времиња. GAZ, моќна руска компанија што е водечка на домашниот пазар на товарни возила, може да се вброи меѓу компаниите, што кризата ги направи да бидат појаки.

GAZ, производител на прочуените историски автомобили Волга и Чајка, а ништо помалку познат и по теренските камиони во служба на бројни војски ширум светот, во септември бил осми најголем производител на возила во Русија. Прва е Lada со 17.189 продадени возила, со голем пад од 51,3% во продажбата, со минимална предност пред Kia со 17.037 возила и со поблаг пад со 16,2%, следат Hyundai, Toyota, VW, Renault и  Skoda, па потоа e GAZ, производител на товарни возила што се вмешува меѓу најголемите производители на патнички автомобили во земјата.

Единствено GAZ и Toyota бележат зголемена продажба во рускиот Топ 10

За споредба, Ford од своите товарни возила продал само 2.003 примероци во септември, но и постигнал раст од 27,7%, што е уште една потврда дека рускиот пазар има зголемена побарувачка од доставни возила. Во рускиот Топ 10, единствено Toyota (+18,2%) и GAZ имале раст во септември.

Во производствената статистика за целиот руски пазар, којашто досега ги има обработено податоците само за првото полугодие, исто така се бележи раст во производството на лесни товарни возила, односно доставни возила, главно фургони. До крајот на јуни, Русија произвела 58.123 доставни возила (+46%), наспроти 39.773 возила во годината на пандемискиот бум и 52.002 возила во 2019 година.

Новиот Gazelle NN веќе стартуваше со продажба во Македонија, преку директен увозник од руската фабрика

GAZelle е носечкиот модел во продажбата на Горковскиј Автомобилниј Завод, производителот од Нижниј Новгород. Една мала разлика во ознаката прави голема разлика во работното секојдневие на GAZelle. Од мај годинава, во фабриката на GAZ се произведува новата генерација на познатиот товарен модел на Русите, GAZelle NN. Кратенката NN може да се толкува како New Next, затоа што претходникот се водеше кaко Gazelle Next, но исто значи и Нижниј Новгород, градот од којшто доаѓа моделот.

Новата генерација на моделот направи голем напредок и практично е рамо до рамо со актуелниот Ford Transit и останатите познати модели на пазарот на товарни возила. Најголемата новина е воведувањето дизел мотор 2.0 TDI, јасно мотор на Volkswagen, со моќност од 136 КС и значително намалена потрошувачка во споредба со претходните мотори од VM. Моторите исполнуваат норма Euro-6 D, што гарантира дека GAZelle NN уште долго време ќе може да си ја обавува задачата во возните паркови на компаниите.

Основни технички податоци за GAZelle NN во фургонска изведба со стандардно меѓуоскино растојание и мотор Volkswagen 2.0 TDI

Руските инженери работеа и на подобрување на возните својства, како и на комфорот за возачот, за да се спречи заморот да влијае врз ефикасноста во обавувањето на работните задачи. Работено е многу и на издржливоста и трајноста на возилото, меѓу другото и со темелна заштита од корозија. За тоа колку техниката на GAZ е издржлива, говори доволно тоа што тркачките тимови на фабриката редовно победуваат на рели натпреварите со теренски возила ширум Русија.

Во меѓувреме е претставена и изведба на болничко возило со пневматска амортизација

Гамата се состои од осум каросериски изведби со моторот Volkswagen 2.0 TDI со 136 КС / 340 Nm и четири каросериски изведби со мотор Cummins од 2,8 литри со 170 КС / 360 Nm. Класичниот фургон е достапен во две варијанти на меѓуоскино растојание, со 3.145 и 3.745 mm. Во верзијата со 2.0 TDI, носивоста изнесува 1.035 килограми. Димензиите на товарниот простор се 3031/1860/1927 mm, зафатнината изнесува 11,5 метри кубни.

Фургонот во верзијата со продолжено меѓуоскино растојание располага со зафатнина од 13,5 метри кубни, и соодветно со димензии на товарниот простор 3631/1860/1927 mm. Носивоста е 900 килограми. За оваа верзија може да се избере 2,8-литарски Cummins. Најголемата нагорнина што може да ја совлада GAZelle NN во оваа изведба е 26 проценти. Растојанието од подлогата е 170 mm мерено под задната оска и под полно оптоварување. Заедно со аглите на пристап и излез од 22, односно 16 степени, тоа укажува на руското потекло на ова возило. Кусо, GAZelle ќе мине секаде.

Втора варијанта е класичен камион со отворена товарна платформа, со нормално или продолжено меѓуоскино растојание, со единечна кабина или со двојна кабина и места за 6+1 патници. Најголемата носивост секако е во кусата изведба со единечна кабина, без надградба, со вредност од 1.705 килограми. Може да се избира меѓу три варијанти: Само шасија, челична платформа или алуминиумска платформа. Димензиите на последнава се 3113/2105/388 mm. Доколку клиентот се реши за моторот Cummins, може да избира меѓу изведби со единечна или двојна кабина со продолжено меѓускино растојание.

Гамата ја комплетира комби-изведбата со 6+1 седишта, во двете варијанти на меѓуоскино растојание. Товарниот простор има димензии 2400/1860/1927 mm, односно 3000/1860/1927 mm во продолжената варијанта.

Македонскиот увозник АБЦ Бротхер веќе започна со испорака на новиот GAZelle NN, очекуваме и тест возење во видно време.

>>> Кон страницата за моделот · https://gazelle-nn.gazglobal.com/mk/