Дарко Јаконов
Ford го прослави производството на 10-милионитиот Mustang. Тој е најпродаваниот спортски автомобил во САД во последните 50 години и воедно најпродаван спортски автомобил во светот во последните три години
Јубилејниот примерок на Ford Mustang вози со задолжителниот V8, со 460 КС, во каросерија лакирана во бело. Кабриолетот, необично за американски автомобил, поседува мануелен менувач. Но, овој избор не е случаен. Првиот примерок од Ford Mustang што се симнал од производствените ленти во 1964 година ја имал истата боја на каросеријата – и тристепен мануелен менувач. Осумцилиндарецот тогаш доспевал само до 164 КС.
Прославата се одвиваше паралелно во седиштето на Ford во Дирборн и во актуелната фабрика за Mustang во Флет Рок, со филмско сценарио. Три авиони P-51 Mustang од втората светска војна, заедно со примероци од сите генерации и сите моделски освежувања на Ford Mustang што се произведувале во последните пет декади, парадираа меѓу седиштето во Дирборн и фабриката.
Ford Mustang е најпродаван спортски автомобил во Европа во последните три години
Од 2016 година, кога Ford Mustang за првпат беше понуден официјално на европскиот пазар, се продадоа над 38.000 примероци. Лани, тој постигна подобра продажба во сегментот од Porsche 911 на дури 13 пазари во Европа. Најголемите пет европски пазари за моделот лани биле Германија, Велика Британија, Франција, Белгија и Шведска.
Во знак на 50-годишнината од „Булит“ со Стив Меквин, Ford годинава изработи специјална серија од актуелниот Mustang, со стилски детали по пример на оригиналниот филмски автомобил. Моторот V8 има добиено и екстра коњски сили. Лимитираната серија е веќе распродадена во повеќето земји.
