Ferrari пред неколку години имал планови за преземање на британската луксузна марка Aston Martin. Тоа го пренесува агенцијата Блумберг, повикувајќи се на инсајдерски информации
Aston Martin од утре ќе котира на лондонската берза. Како информација којашто може да влијае врз вредноста на акциите, агенцијата Блумберг денес пренесува дека Ferrari пред неколку години планирал да ја презеде сопственоста над традиционалната британска марка со вреден имиџ.
Италијанците почнале да ги разгледуваат опциите уште во 2014 година, откако кормилото на спортската марка го презеде Серџо Маркијоне, кој почина во јули. Намерата била Ferrari да ја збогати својата моделска понуда надвор од традиционалните сегменти на суперспортската марка, заради привлекување нов и поширок круг купувачи. Плановите биле напуштени, откако менаџментот решил Ferrari самостојно да развива нови модели. Акциите на компанијата се најдоа на берзата во октомври 2015 година.
Според Блумберг, воведната вредност на акциите на Aston Martin изнесува 19 фунти. На берзата се понудени една четвртина од акциите на луксузната марка.