Дарко Јаконов
Мотото под коешто се одржува сосем новиот концепт на салон на автомобили ИАА Мобилност 2021 гласи „What will move us next“. Во Минхен до 12-ти септември ќе бидат прикажани сите нови видови на мобилност што ќе го освојуваат светот во претстојните години. Главниот печат е ставен на електричниот погон.
Во Минхен деновиве е поставена „сина лента“, по којашто за време на одржувањето на салонот ИАА Мобилност може да се направи пробно возење на огромен број електрични автомобили, скутери и други видови превозни средства на струја. Нормално дека по „сината лента“ сообраќаат и електрични автобуси, како дел од јавниот превоз. Четири електрични градски автобуси Mercedes-Benz eCitaro ги превезуваат посетителите од едно до друго место на коешто се одржуваат настани во рамките на салонот, безшумно, брзо и без штетна емисија.
Автобусите сообраќаат од „самитот“, кадешто се наоѓаат штандовите на најголемите производители и доживуваат премиери најважните новитети на сцената, до „отворениот простор“ во централното јадро на Минхен.
Неколку изјави од посетителите на ИАА Мобилност и корисници на превозот со електрични автобуси:
- Убаво е сознаението дека се создаваат помалку ПМ-честички. Тоа е важно токму во големите градови.
- Возењето е пријатно и тивко, човек може да одмори.
- Многу е пријатно, многу мирно. Одлично. Да, тоа е апстрактно за голем број луѓе. Многу се слуша за електромобилноста, но ретки се можностите за таа да се испроба и да се користи. Ова е одлична идеја.
- Многу е пријатно чувството при возењето.
Во текот на полчасовната автобуска тура, гостите можат да се одморат од напорните салонски денови и да ги наполнат своите телефони преку многубројните УСБ-приклучоци во автобусот. На дисплеите се прикажуваат презентации за напредните технологии на eCitaro, каква што е новата генерација на литиум јон батерии.
Од електричните автобуси се одушевени и возачите, од кои дел првпат имаат можност во Минхен да возат автобус со електричен погон.
