за

Не е секој кинески СУВ на струја: Glory 500 во продажба од декември

Изгледот на Glory 500, што ќе биде трет модел од DFSK на македонскиот пазар, неодоливо потсеќа на електричниот Seres 3. Има и причина за тоа, Glory 500 во основа е бензинска варијанта на компактниот СУВ.

Се збогатува понудата од модели на кинескиот концерн DFSK на нашиот пазар. По СУВ-седумседот Glory 580 и по стилското СУВ-купе Glory F5, следен модел е компактниот Glory 500. Со впечатлив изглед, богата опременост и добра просторна понуда, тој се вмешува во конкуренција со Dacia Duster, Ssangyong Korando, па зошто да не и против Hyundai Tucson.

Со моделите на кинескиот концерн DFSK, нашиот пазар практично е во привилегирана положба во споредба со големите европски пазари. Додека кај водечките светски марки обично се случува одредено доцнење при пристигнувањето на нивните нови модели на македонскиот пазар, кај DFSK е спротивна ситуацијата. Glory 580 се продава на нашиот пазар долго пред тој да биде понуден на некои од најголемите пазари во Европа, а СУВ-купето Glory F5 уште им е непознаница.

Секако дека постои причина зошто Glory & Co пристигаат на македонскиот пазар во исто време со германскиот, италијанскиот или францускиот, ако не и порано. Увозникот DFSK ги нарачува возилата за Македонија директно од производителот, нема регионални претставништва, повлекување возила од залиха, возилата доаѓаат директно од фабрика, па брод, до „дворот“ на увозникот АБЦ Бротхер во скопско Визбегово.

New photo by Automedia MK / Google Photos

Новиот модел DFSK Glory 500 се очекува да пристигне во декември. Станува збор за модел од компакт класата, а бидејќи кај возилата од Кина уште сме научени да бараме прво „цена“, први конкуренти на Glory 500 ќе му бидат најдостапните СУВ-модели во компакт класата – Duster и Korando. Моментно и Киа Моторс Македонија има сензационална понуда за Sportage, пред замената со моделот од новата генерација, но нема да биде изненадување ако планираниот контингент уште сега е исцрпен.

Моторот е истиот како во големиот Glory 580, но е без турбонатполнење; Во секој случај, 116 КС се далеку од малку

Школката на Glory 500 е идентична со Seres 3, електричниот автомобил што неодамна беше на тест возење во Аутомедиа. Менаџерите на кинескиот концерн – од кои половината е многу веројатно дека доаѓаат од европските концерни – одиграа вешто со тоа што побараа каросеријата за СУВ-моделот да може да користи и чисто електричен погон и чисто бензински погон. Дури постои и варијанта со приклучен-хибриден погон, но засега нема најави дека АБЦ Бротхер ќе ја нуди истата во Македонија.

New photo by Automedia MK / Google Photos

Од тоа што можеме да го очекуваме од Glory 500, раководејќи се според мошне позитивните искуства од нашиот тест на електричниот Seres 3, новиот модел на DFSK во Македонија ќе располага со изненадувачки комфорно и тивко подвозје, со солидна изработка на каросериската школка, но и со вешта завршна изработка, со кокпит во стил на Audi од пред две генерации, со добра просторна понуда, практичен, солиден, генерално позитивно.

Околу цената на Glory 500, првично добивме потврда дека топ-изведбата би чинела приближно колку големиот Glory 580 со мануелен менувач, односно под 15.000 евра. Тоа несомнено е мошне привлечна цена, иако во нашата стагнирачка економија и натаму би очекувале големите СУВ возила од Кина да чинат веројатно под 10.000 евра. Меѓутоа, факт е дека денес и градските автомобили од понова генерација и од водечките марки чинат 15.000 евра. DFSK сепак нуди голем автомобил, СУВ, опремен, со моќен мотор од 116 КС, па и со успокојувачка гаранција.

Општи технички податоци · DFSK Glory 500

New photo by Automedia MK / Google Photos

Должина · 4385 mm

Ширина · 1850 mm

Висина · 1645 mm

Меѓуоскино растојание · 2655 mm

Растојание од подлога · 191 mm

Тежина на празно возило · min 1380 kg

Резервоар · 50 L

Багажник · 318 L

МОТОР · 1,5 литар, 116 КС, 4 цилиндри

Ознака на мотор · SFG15A (ист мотор како Glory 580, но без турбонатполнење)

Вид · Бензински

Впрскување · Во повеќе точки

Работна зафатнина · 1498 ccm

Натполнење · (Нема турбо, атмосферски мотор)

Конструкција · 4 цилиндри, 16 вентили

Моќност · 85 kW 116 КС при 6000/min

Вртежен момент · 147,5 Nm при 3600/min

Класа на емисија · VI

Потрошувачка L/100 km (град, пат, просек) · 8,1 / 5,5 / 6,4 (Мануелен менувач); 8,8 / 5,1 / 6,4 (CVT менувач)

Менувач · Мануелен со 5 степени (безстепен менувач CVT)

Погон · Напред

Водење на тркалата · Напред мекферсон, нзад торзиска оска

Сопирачки · Вентилирани дискови напред, диск назад

Паркирна сопирачка · Електронска паркирна во топ изведба со ЦВТ, обична во други

Гуми · 205/65R16 стандардно, 215/60R17 во врвната изведба

Резервно тркало · Со намалени димензии

Тркала · Лесна легура, само основниот модел е со челични тркала

ОПРЕМА (во топ изведба)

New photo by Automedia MK / Google Photos

Мануелна клима

Централна брава со далечинска команда

Стартување на мотор на копче

Пристап без клуч

Темпомат

Паркинг сензори назад

Камера назад

Автоматска паркирна сопирачка

Помош при поаѓање на нагорнина

Помош при спуштање по стрмнина

Халогени светла

Автоматско вклучување на светла

Навигација

Гласовни команди

Дисплеј на допир

Блутут

УСБ

Потпирач за рака напред и назад

Мултифункциски волан

Електрика на сите прозорци

Сончев покрив 

Собирање на ретровизори

Сензор за дожд

 

New photo by Automedia MK / Google Photos
New photo by Automedia MK / Google Photos
New photo by Automedia MK / Google Photos
New photo by Automedia MK / Google Photos

 

>>> Тест на Seres 3 · СУВ од Кина, електричен и премиум

 

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Rolls-Royce има електричен автомобил, името е Spectre

Audi дава одговори: Што откако ќе мине употребниот век на батеријата?