Осум месеци во низа опаѓа продажбата. БИД се соочува со смалена побарувачка на пазарот во Кина. Во исто време, добива на значење извозот на светскиот пазар, што го стабилизира бизнисот на кинескиот производител.
Кинескиот производител на електрични автомобили БИД значително ја зголеми продажбата во април во споредба со лани, но на годишно ниво заостанува зад ланските резултати. Концернот во минатиот месец продаде 321.123 електрични автомобили и приклучни хибриди. Тоа е раст од 6 проценти во споредба со март.
Но, во споредба со лани, априлската продажба годинава е смалена 15 проценти. Тоа значи дека БИД осми месец во низа продава помалку возила отколку во минатата година.
Продажбата е ослабната и во целиот период од почетокот на годинава. Со малку над еден милион продадени автомобили до завршетокот на април, БИД е 26 проценти под нивото од истиот период лани.
Освен сезонските ефекти и празнувањето на кинеската Нова Година, врз исходот влијае и укинувањето на субвенциите, како и вжештената конкурентска трка на домашниот пазар. Тоа се покажа и во финансиите. Добивката во првото тромесечје е повеќе од преполовена.
Јакне извозот на БИД
Наспроти тоа, јакне извозот. Со 134.542 продадени возила на светскиот пазар, април е рекорден месец на БИД, со раст од 71 проценти. Извозот сега учествува со преку 40 проценти во вкупната продажба на компанијата. БИД на тој начин реагира на забавената продажба на домашниот пазар.
Во рамките на концернот, продажбата главно отпаѓа на носечката марка БИД, со 273.448 возила, но пак има големи отстапувања. Поттик за продажбата доаѓа од помалите марки, како Фангченгбао, додека премиум марката Денза и натаму е под ланскиот резултат.
