Идејата за менување на логото на BMW не мина најдобро

Новото лого на BMW предизвикува спротивставени ставови. Едно истражување покажа дека стариот заштитен знак на Баварците се цени многу повеќе.

BMW го прикажа новото лого. Целта беше на тој начин да се одговори на „промените во очекувањата и навиките“, како што беше наведено во соопштението од компанијата. Но, многумина не се сложуваат со тоа. Во истражувањето од институтот YouGov, за старото лого позитивно се изјаснија 49 проценти од испитаниците, кои оценија дека тоа е одлично или многу добро. Истото мислење за новото лого го имаа само 28 проценти од анкетираните лица. За истражувањето, половина испитаници го добија на увид старото, а другата половина новото лого, но без можност за директна споредба на двете верзии на логото.

Дури по изјаснувањето, учесниците можеа да ги погледнат двете лога заедно. Притоа се покажа уште поголема разлика во оцените. Дури 71 проценти од испитаниците ценеа дека во директна споредба е подобро старото лого, додека само осум проценти се решија да искажат повеќе симпатии за новото лого.

Новото лого сепак е наменето само за комуникацијата. Тоа нема да се користи на автомобилите и мотоциклите на BMW, исто како и на објектите на дилерите.