Дарко Јаконов
Измамнички групи со возила што се преправени да личат како возила на автоклубот ADAC, ловат патници во неволја по патиштата во регионот. Посебни уреди го попречуваат телефонот.
Лажни „Жолти ангели“ на ADAC повторно оперираат по патиштата во Источна и Југоисточна Европа. Тие наплаќаат неразумно високи суми за носење во сервис на возилата во дефект, како и за поправки што обично се измислени. Освен во Унгарија и Србија, од клубот со седиште во Германија, предупредуваат дека лажните возила зачестено се среќаваат и во Бугарија, Хрватска и Словенија. Измамниците работат и во Словачка, Литванија и Полска.
Возилата се лакирани во препознатливата сигнална жолта боја на ADAC, заедно со останатите визуелни обележја, како и со логото на клубот и со натпис „Im Auftrag des ADAC“ (по налог на ADAC). Во некои случаи, измамниците користат и возила со натпис што оддалеку личи на логото, од типот на ACDC и слично. Лажните помагачи носат и облека во боите на клубот.
Клубот ADAC воопшто не располага со сопствен возен парк надвор од Германија. Партнерите на клубот исто така не смеат да ги користат обележјата на клубот, ниту на возилата, ниту во сервисните работилници. Единствен исклучок е возилото на ADAC во северна Италија, со коешто се интервенира во случај на дефект.
Криминалците обично чекаат на автопатот и директно нудат помош при дефект. Телефонските повици на патниците во неволја обично не успеваат, затоа што измамниците користат попречувачи на сигнал во своите возила. Во таков случај, возачот во неволја треба да го заклучи возилото и да се оддалечи неколку метри од местото, за оттаму да се обиде да добие сигнал.
