Возачите што умеат да уживаат во возењето, неретко помислуваат и на следното ниво, да си обезбедат дозвола за возење камион. Една школа за обука на возачи на камион во германскиот град Ибенбирен има понуда што не се одбива: Обука со Mercedes Actros од најновата генерација.
Возачите на камион се дефицитарен кадар и школите за возачка обука добиваат големо значење во привлекувањето нови професионални возачи. Една автошкола од германскиот град Ибенбирен буквално го разбира „привлекувањето“: Возачката академија Минстерланд го има комплетно новиот Mercedes-Benz Actros како возило за обука.
Зависно од обуката, за категориите C или CE, „школскиот“ камион Actros 2545 може да се вози соло или со приколка. Дополнително седиште во средина овозможува инструкторот да седи блиску до ученикот и да интервенира по потреба. Секако дека во просторот за нозе во средината се поставени педали, исто како и пред десното седиште.
Возачите се одушевени од техниката во Mercedes Actros
Посебно подрачје од обуката претставува запознавањето со системите за асистенција, коишто новиот Actros ги има во изобилие и кои на идните профи-возачи ќе им помагаат во секојдневието. Секако дека во тоа спаѓа и MirrorCam, односно системот од камери место ретровизори, како и системот за полуавтоматско возење.
Во возачката школа Минстерланд годишно се обучуваат по 150 почетници возачи. Целта е да се создадат професионалци за транспортната бранша. од германската автошкола порачуваат дека само компаниите што имаат врвно квалификувани возачки и возачи зад воланот, може да бидат во состојба да понудат квалитетни услуги.