Од првиот дизел мотор во Opel со тогаш сосем доволни 60 КС, до шестцилиндарски мотор со спортски карактер, сето тоа го има доживеано Rekord D, еден од највпечатливите и најценети модели од Риселсхајм.
Opel Rekord D во јануари ќе одбележи половина век од премиерата. Кога се појави во 1972 година, овој легендарен модел на Opel наследи голем товар. Неговиот претходник, Rekord C, се произведе во 1,2 милион примероци. Тоа беше една шестина од сите автомобили што Opel ги имаше произведено во своето 70-годишно постоење. Во соопштението за печатот, што во тоа време вистински беше „печат“, маркетингот во Риселсхајм напиша дека „на пазарот му е потребен Rekord“. Во соопштението понатаму пишуваше: „Носечката улога што Rekord од 66-та ја играше пет години, тој сега му ја препушта на својот млад наследник, што ќе владее со сцената во следните години.“
Тоа предвидување се оствари. Opel Rekord D појде по сосем различни патишта и постави нови мерила. За разлика од Rekord C, чијшто дизајн „Coke-Bottle“ беше инспириран од американските сестриски модели од концернот GM, новиот модел имаше европски стил. Јасни и функционални линии, мазни површини и големи прозорци, заедно со ниска линија на појасот (тоа е делот под долниот раб на каросеријата), создадоа една од најпрепознатливите појави на сцената. Rekord D пристигна на пазарот исто како „неочекуван гостин на забава, (…) што донесува свеж дух во душтвото“, пишуваше во соопштението.
https://photos.app.goo.gl/xg5Re7kG9CRWDQHN6
Производството на Rekord D започна уште во декември 1971 година во Риселсхајм. Исто како претходниците, моделот беше достапен со три различни каросерии: Класична лимузина со две или четири врати, спортско купе и верзија Caravan, по којашто некои уште ги нарекуваат комби-возилата. Продолжувајќи ја традицијата на Schnelllieferwagen (возило за брза испорака) од 1950-те и 1960-те години, Opel произведуваше и товарна верзија. Тоа беше комби со три врати, без задни странични прозорци, наменето за компании и занаетчии.
Безбедноста на прво место уште: Со зони на гмечење и заштита при страничен судир
Opel Rekord D (познат и како Opel Rekord II, заради избегнување забуна со „D“ за дизел) постави нови мерила во поглед на пасивната безбедност. Зајакнувањата во праговите и во покривот обезбедуваа заштита во случај на страничен судир или превртување. Зони на гмечење го ублажуваа напрегањето на телото на возачот и патниците при челен судир.
Бензинските мотори на Rekord D беа усовршена изведба на познатите четирицилиндарци со брегасто вратило во глава (cih = camshaft-in-head) што се имаа докажано повеќе од два милиони пати. Основата ја претставуваше 1,7-литарец со 66 КС, неговата S-варијанта располагаше со 83 КС, најсилен беше 1,9-литарскиот мотор со 97 КС.
https://photos.app.goo.gl/JLhFLVZsdqLxV2aF6
Во септември 1972 година се појави Opel Rekord со дизел мотор, како светска премиера. Тоа беше првиот автомобилски дизел во историјата на компанијата. Три месеци претходно, моторот со турбонатполнење и вртложна комора се имаше докажано во Opel GT со аеродинамично оптимирана каросерија. Тогаш беа поставени 18 интернационални и два светски рекорди, во тест-центарот во Дуденхофен.
Дизелот располагаше со 60 КС, во просек трошеше 8,7 литри дизел на сто километри и постигнуваше 135 km/h. Rekord 2100 D е препознатлив по хаубата што е подигната во средината. Тој детал беше неизбежен, затоа што дизел моторот со брегасто вратило во главата беше повисок од бензинците.
Opel Commodore за „љубители на моќни крстосувачи“
Во март 1972 година беше претставен Commodore B, како врв во понудата. Моделот имаше за цел да го пополни просторот меѓу Rekord и моделите од високата класа Admiral и Diplomat. Каросеријата потекнуваше од Rekord, но Commodore B имаше мошне луксузна опрема и се произведуваше само со шестцилиндарски мотори со висока моќност. Моторот 2,5 S располагаше со 115 КС. Над него беше позициониран Commodore GS со 130 КС.
Подоцна во GS-варијантата беше вграден 2,8-литарец со два регистерски карбуратори и моќност од 142 КС. Во септември 1972 следеше топ-моделот во семејството на Commodore: GS/E со моќност од 160 КС. Моторот од 2,8 литри со електронско впрскување обезбедуваше врвни перформанси: Купето постигнуваше 200 km/h, а лимузината пет km/h помалку.
https://photos.app.goo.gl/ktWbJxzZc1V9UvKD6
Со такви перформанси, Commodore GS/E беше предодреден за кружни и за рели трки. Тогаш младиот Валтер Рерл, првпат стартуваше со Opel на рели Монте Карло во 1973 година. Трката мина успешно, иако купето Commodore GS/E дотерано кај тјунерот Irmscher мораше да стартува во категоријата на чистокрвните рели возила од група 2, бидејќи возилото немаше хомологација.
Најголемите победи на Opel Commodore и Rekord сепак беа надвор од тркачките патеки, во секојдневието. Во почетокот на септември 1976 година, златен Rekord D ја напушти производствената лента како милионско возило од моделската серија. По тој повод, Opel произведе мала серија од специјалната верзија „Милионер“ со 2,0-литарски S со 100 КС и со ниво на опрема Berlina. Последниот Rerkord замина од производствената лента во септември 1977 година, по 1.128.196 примероци од Rekord D и 140.827 примероци од Commodore B.
https://photos.app.goo.gl/R2cz19hFQzNh1qeA9
https://photos.app.goo.gl/Bm9G9z1YGZWQuzj59
https://photos.app.goo.gl/oYZJKcUG2hYRDeG56
https://photos.app.goo.gl/st6rJDtw5HqSXkhT7
https://photos.app.goo.gl/1CqXeTJsSwJf2mcL8
https://photos.app.goo.gl/gFoqmsh499jRupF18
https://photos.app.goo.gl/rkD6g1acXxWZYDnF7
https://photos.app.goo.gl/BzM8WKtbxqg8weNMA
https://photos.app.goo.gl/qtnCvVAnb4UKm2Ph7
https://photos.app.goo.gl/8m99W8wjnnRL5kaS6
https://photos.app.goo.gl/gB4PjRd3ujz2J5pJ6
https://photos.app.goo.gl/zCzvpqxGKbDnUXs56
https://photos.app.goo.gl/bkeMhdAXN5VfHsBF9
https://photos.app.goo.gl/tQT7pG9WMtTMyw4b7
https://photos.app.goo.gl/mZEZWHi6EQQ2UMB58
https://photos.app.goo.gl/shEbY9PEYSDyJi8WA
https://photos.app.goo.gl/eVHRSB5Epq4BH4aa9
https://photos.app.goo.gl/7Ft8SxFbcc2MDses7
