Mercedes-AMG GT 4 е верзија на стандардното спортско купе на AMG со дополнителен чифт врати. Освен тоа што има две седишта повеќе и малку повеќе багажник, во тркачката душа на ова GT не се менува многу. Има и верзија со хибриден погон, со компресор со електричен погон и 48-волтна мрежа.
Повеќе простор, повеќе моќност, а истата доза возачко уживање. Така Mercedes-AMG ја претставува новата верзија со четири врати од купето GT. Како втор модел развиен самостојно од спортската подмарка на Mercedes, GT 4 нуди поголема практичност во секојдневието, но ја задржува изразената спортска нота на стандардниот GT.
Со препознатливата силуета, AMG GT 4 се разликува драстично од втората купе-лимузина со знакот на Mercedes. За разлика од CLS, кој се претставува како елегантна и стилска алтернатива, GT 4 јасно настапува како чистокрвен спортски автомобил. Porsche Panamera добива силен конкурент.
Најсилната варијанта на купе-лимузината на AMG постигнува 315 km/h
Во топ-моделот AMG GT 63 S работи познатиот 4,0 V8 битурбо со 639 КС и вртежен момент од 900 њутнметри. Спринтот до 100 km/h завршува по 3,2 секунди, крајното темпо е 315 km/h. Без додатокот S, купе-лимузината располага со 585 КС. Обете верзии стандардно возат со погон на сите тркала. Mercedes-AMG во V8 моторот за првпат користи валчести лежишта во двата турбополначи. Тоа го намалува триењето, турбината реагира побрзо.
Штедливоста не му е непозната на масовно вградуваниот V8 во целата гама на Mercedes. Кога е избрана комфорна програма за возење и возачот не бара повеќе од 3.250 вртежи, половина од цилиндрите се исклучуваат. Поголем талент во овој поглед има верзијата AMG GT 53 4Matic, со новиот линиски шестцилиндарец на AMG.
Трилитарецот со 435 КС располага со буст-функција, со екстра 22 КС и 250 њутнметри. Оваа дополнителна моќност е дело на EQ Boost стартер-генераторот, односно на електромоторот кој вграден меѓу моторот и менувачот, и којшто ја презема и функцијата на стартер и алтернатор. Во комбинација со дополнителен компресор со електричен погон и со класичен турбополнач, AMG GT 53 постигнува иновативна комбинација од штедливост и спортски перформанси, со фабрички декларирани 9,4 литри на сто километри. Спринтот трае 4,5 секунди, крајната брзина изнесува 285 km/h.
Со 48-волтната мрежа се отвора простор за нови функции
Споменатиот EQ Boost стартер-генератор произведува струја и за 48-волтната мрежа на GT 53. Преку DC/DC претворач се снабдува и обичната 12-волтна мрежа, за светлата, кокпитот, инструментите и контролните уреди. Со 48-волтниот акумулатор се зголемува батерискиот капацитет на целото возило и се добива повеќе електрична енергија за нови функции. Mercedes најавува нови системи за асистенција и инфо-забавни функции коишто ќе следат со воведувањето на 48-волтната мрежа.
Обете моделски изведби поседуваат автоматик со 9 степени, но во различна варијанта. Осумцилиндарските модели користат AMG SPEEDSHIFT MCT 9G, со таканаречена мокра спојка за поаѓање. Тоа штеди тежина и инертност, менувачот реагира побрзо. Софтверот се грижи за куси промени на степен, враќање повеќе степени и функција на меѓугас. Дополнително стои на располагање и функција Race Start. Наспроти тоа, шестциулиндарците се комбинирани со AMG SPEEDSHIFT TCT 9G, кој работи со класичен претворач на вртежен момент.
Разлики има и во подвозјето. AMG 53 стандардно располага со спирални пружини и приспособлива амортизација, додека осумцилиндарскиот AMG 63 се испорачува со повеќекоморна пневматска амортизација AMG Ride Control+. Со доплата може да се добие и управување на задната оска, коешто е стандард кај V8-моделите.
Како чистокрвни тркачки машини, купе-лимузините на AMG поседуваат и параметарско управување со променлив преносен однос и три степени на чувствителност, исто како и композитни или керамички сопирачки дискови (со доплата), со сопирачки клешти во сребрена боја кај V6, црвена кај V8 и жолта кај V8 S, односно бронзена боја кај керамичката опција.
AMG GT 53 и AMG GT 63 стандардно лежат на бандажи со 10 краци во ванадиум-сребрена боја, со димензија 9,5 J x 19 H2 ET 22 и гуми 255/45 R 19 напред, односно 11,0 J x 19 H2 ET 17 со гуми 285/40 R 19 назад. AMG GT 63 S 4MATIC+ стои на петкраки полирани бандажи во тантал-сива боја, со димензија 9,5 J x 20 H2 ET 22,5 и гуми 265/40 R 20 напред, односно 11,0 J x 20 H2 ET 20 и гуми 295/35 R 20 назад.
Продажбата на купе-лимузината AMG GT 4 ќе стартува налето.
Mercedes-AMG GT R извозе нов рекорд на Нирбургринг
Париз 2016: Гласниот Mercedes-AMG GT Roadster ја вознемири француската престолнина
Mercedes-AMG GT R: Овој е излезен од „Зелениот пекол“
