Дарко Јаконов
Европската мрежа од ноќни возови се продолжува за уште една делница, што е долга 1.043 километри и 19 часови патување. Од неделава, патниците од Берлин можат со ноќен воз да патуваат за Копенхаген, Малме и Стокхолм. Оваа железничка врска е достапна секој ден, со септември, а возовите од наесен ќе сообраќаат четири до петпати во неделата.
Првпат по речиси три децении, ноќен воз повторно ги спојува Германија, Данска и Шведска. Возовите поаѓаат од Берлин кусо пред 19 часот, пристигањето во Стокхолм е во 14.30 часот во следниот ден. Повратната врска поаѓа од Шведска напладне. Цените за купе за спиење почнуваат од 74 евра.
Враќањето на мрежата од ноќни возови претставува важна алка во синџирот мерки за спречување на климатските промени. Идејата е возовите, што нормално користат погон на електрична енергија, да го заменат автомобилскиот и авионскиот сообраќај меѓу европските држави. Планот е бројот на ноќни возови да се зголемува во иднина.
Германската Железница, заедно со државните компании од Франција, Австрија и Швајцарија, најави дека во иднина со ноќни возови ќе бидат поврзани 13 милионски метрополи во Европа. Во декември се планира да стартува сообраќањето на релација Виена-Минхен-Париз и Цирих-Келн-Амстердам. Кон крајот на 2023 година ќе им се придружи ноќен воз на релацијата Виена-Берлин-Брисел-Париз, една година подоцна следи Цирих-Барцелона.
