Во Париз е претставена новата тркачка серија со електрични возила ETCR. Во јули започнува промотивната тура, за в година да следи и стартот на електричната „туристичка класа“.
Натпреварувачкиот концепт на новата серија што се официјално се води како „Pure ETCR“ е различен од класичната шема на одржување кружни трки. Место тоа, возачите ќе се соочуваат во групи од по четворица, во таканаречени „Battles“. Победничкиот возач во една тура ќе добие најмногу бодови. Во викендите ќе се возат по три тури, по што четворицата најдобри возачи ќе се борат во завршна трка за место на победничкиот пиедестал.
Во возилата за ETCR ќе се вградува батерија од Williams, додека гумите ќе ги испорачува Goodyear. Големината на батеријата изнесува 62 киловатчасови. Според официјалните податоци, тоа е доволно за времетраењето на трката од 21 минути. Во тоа се вклучени и четири користења на функцијата „Push-to-Pass“.
Батеријата се полни за еден час, краткотрајно може да се постигне моќност од 680 КС
Батеријата се полни од десет до 90% за еден час. Трајната моќност на тркачките болиди во ETCR изнесува 408 КС или 300 киловати. Со краткотрајно зголемување на моќноста (Push-to-Pass) се добиваат 680 КС, односно 500 киловати. Силата од електромоторот се пренесува на задната оска.
Првото претставување на серијата на големата сцена ќе биде на прочуениот Фестивал на брзината во Гудвуд, од 9-ти до 12-ти јули. Промотивната тура продолжува во Копенхаген, на австрискиот Залцбургринг и во Инџе (Јужна Кореја), кадешто ќе се вози во рамките на серијата WTCR, како и во Гуангдонг, Кина. Потоа следи настап за време на 24-часовната трка во Дајтона/САД, на 30-ти јануари 2021 година.
Организаторите очекуваат за серијата да бидат пријавени 18 возачи. Календарот предвидува осум трки, од кои четири ќе се возат во Европа. Од 2022 година, сезоната ќе се прошири со уште две трки.
Организатор е Eurosport Events, истиот што стои зад WTCR. Две автомобилски марки досега развија болиди за ECTR, тоа се Cupra и Hyundai.