Дизелот можеби го доби завршниот удар, откако Porsche потврди дека ќе престане да го нуди во своите модели. Покрај силното влијание на името Porsche врз целата бранша, ова може да е последното поглавје за моторот што во последниве две години е под постојан притисок на судовите и еколозите
Porsche најави дека ќе престане да нуди дизел мотори во своите купеа, кабриолети, лимузини, родстери и теренци. Место тоа, спортската марка на VW ќе се ориентира на бензинци, на електричен и на плагин-хибриден погон. До 2022 година, Porsche вложува над шест милијарди евра во електромобилноста. Освен во развој и усовршување на модели со електрифицирана погонска спрега, како и во производство, дел од оваа масивна инвестиција е наменет и за инфраструктурни проекти.
Дизелите уште лани спаднале на 12 проценти во вкупната продажба на Porsche
Чекорот можеше да се претпостави, имајќи предвид дека уделот на возила со дизел мотори во вкупната продажба на Porsche изнесувал само 12 проценти лани. Шефот Оливер Блуме го потврди збогувањето со дизелот, со изјавата: „Како производител на спортски автомобили, дизелот за нас отсекогаш имаше споредна улога, меѓутоа сега дојдовме до заклучок, дека сакаме нашата иднина да биде без дизел.“
Porsche уште во февруари престана да испорачува модели со дизел мотори, откако германските власти утврдија дека во нив се користи софтвер за манипулирање со емисијата на штетни материи. Моторите пристигаа од престижната марка Audi, за коишто претходно исто така беше утврдено присуство на недозволен контролен софтвер.
Како резултат од истрагата, Porsche мораше да повика 60.000 примероци од Cayenne и Macan во своите сервисни работилници, заради отстранување на неправилностите во контролата на издувните гасови. Во меѓувреме расте интересот за моделите со хибриден погон. Два од три купувачи на спортската лимузина Panamera во Европа се решаваат за плагин-хибридната верзија. В година пристига и Taycan, првиот модел на Porsche со погон само на батерии. Дизајнот и погонската техника веќе се познати од концептниот автомобил Mission E.
Воведувањето забрана за сообраќај за дизели со емисија послаба од Euro 5 на неколку улици во Хамбург, како и зачестените најави на останатите германски градови дека ќе воведат ригорозни мерки за старите дизели, предизвикаа намалување на интересот кај купувачите за овој вид на мотори.