Дарко Јаконов
Синоќа во пригодна атмосфера во Сити Хол во Скопје беше претставена шестата генерација на Opel Corsa. Неколку нови безбедносни системи се вградуваат како стандард, гамата вклучува и изведба со електричен погон, којашто ќе биде понудена подоцна.
По ланската голема обнова во класата на моделите од компакт класата, годинава тоа следи кај таканаречените модели од градската класа, кои некогаш го сочинуваа најголемиот дел од возниот парк во Макединија. Во пријатниот простор на Сити Хол, синоќа се одржуваше македонската премиера на новата генерација на Opel Corsa, познато и ценето моделско име меѓу возачките и возачите кај нас.
Моделската серија брои вкупно 13 милиони продадени примероци од 1982 година наваму, со што Corsa се вбројува меѓу најуспешните модели на марката од Риселсхајм. Основната моделска изведба со мотор со 75 КС на македонскиот пазар ќе чини 12.920 евра. Corsa отсега е достапна само во каросериска изведба со пет врати. Во понудата има и еден дизел, но врвот во поглед на изборот од погон припаѓа на електричната изведба.
Corsa F, како што е генерациската ознака, повеќе не е скромен автомобил за низ град, туку е сериозно и зрело возило со самоуверен стил. Каросеријата порасна минимално на 4,06 метри, ширината остана на 1,77 метар. Меѓуоскиното растојание порасна за 2,8 сантиметри, а порасна и багажникот за 24 литри, што значи дека сега нуди најмалку 309 литри.
Новата Opel Corsa повеќе се профилира како стилски автомобил, со можност да се даде и личен печат во изгледот
Постојат бројни можности да се даде личен печат во изгледот, со контрастни бои за ретровизорите, маската, бандажите и покривот. Неколку ставки од дополнителната опрема имаат премиера во класата, од типот на диодни матрични светла или масажна функција во седиштата.
Бидејќи платформата доаѓа од исто така новиот Peugeot 208, идентични се и моторите со францускиот близнак. Тицилиндарскиот турбо-бензинец од 1,2 литар се нуди во изведби со 75 КС, 100 и 130 КС, дизелот од 1,5 литар располага со 102 КС.
Во следната пролет пристига електричната изведба со електромотор со 136 КС и досег до 340 километри. Секако дека оваа изведба ќе биде повеќе интересна и воедно подостапна на пазарите кадешто се субвенционира чистиот погон на струја. Конретно во Германија, со субвенција што надминува 7.000 евра, цената на Corsa E се сведува на ниво на солидно опремена верзија со моќен мотор.
За натаму се планира и верзија со уште посилен спортски нагласок, по пример на Corsa OPC, за којашто се шпекулира моќност од 190 КС.
