Алесандро Дамброзио пристига во Mitsubishi директно од студиото на Audi во Минхен. Дизајнерската ѕвезда ќе внесе футуристичка нота во изгледот на јапонската марка
Алесандро Дамброзио е новиот генерален директор за напреден дизајн во Mitsubishi Motors. Тој ќе раководи со тимовите во трите главни дизајнерски студија на јапонската марка, односно со центрите во Оказаки, Токио и Франкфурт. Дизајнерот чиешто име долго време се спомнува на сцената ќе ги поднесува своите креации пред Цунехиро Кунимото, вицепретседател за дизајн на Mitsubishi.
„Алесандро е мошне искусен и вешт дизајнер, со долга кариера кај водечките автомобилски компании,“ изјави Кунимото. „Очекувам тој да ги инспирира нашите тимови во создавањето на следната генерација на дизајнот на Mitsubishi и да придонесе за обновувањето и унапредувањето на марката Mitsubishi Motors во нејзиниот глобален напредок.“
Дамброзио ќе ги постави основите на стилот за идната генерација модели на Mitsubishi
Италијанецот пристига во Mitsubishi во време кога се поставуваат основите на стилот за идната генерација модели на марката. Предизвикот за Дамброзио е да ги соедини сите моделски икони во историјата на Mitsubishi во нов препознатлив стил, во когошто ќе има елементи во целиот дијапазон, од спортскиот Evo до робусниот Pajero.
Дамброзио е роден во Милано и ја започнува кариерата во Fiat, во центарот за стил на Lancia. Фановите на Alfa Romeo ги препознаваат и ги ценат моделите чијшто изглед тој го создаваше во своите осум години работа како главен дизајнер за миланската марка, меѓу кои Alfa 159, Mito и Giulietta. Следниот работодавец е Maserati, а потоа и групацијата Volkswagen, кадешто е шеф на Audi Concept Design Studio во Минхен. Меѓу неговите највпечатливи креации во тоа време е уникатниот Lamborghini Egoista, со когошто беше одбележана 50-годишнината на болоњската марка. Тој има работено и на дизајнот на Volkswagen Polo и Passat, Bentley Bentayga, Audi A4, A5 и концептниот Audi TT Sportback.
