Европскиот конзорциум за оценување на безбедноста на новите автомобили Еуро НКАП ги заврши тестирањата за годинава и го прогласи победникот. Највисоки оцени на краш-тестовите годинава постигна новата генерација на Мерцедес-Бенц ЦЛА.
Експертите на Еуро НКАП излегоа со крајно позитивни оцени по тестирањето на ЦЛА и порачаа дека тоа ја „прикажува долготрајната посветеност на Мерцедес да развива побезбедни автомобили.“ Првиот модел врз новата платформа ММА на Мерцедес-Бенц, којашто е наменета за модели од компакт класата и дозволува конструирање модели и со електричен погон и со мотори со внатрешно согорување, одушеви во сите четири категории на тестови во коишто Конзорциумот ја проверува безбедноста на новите автомобили.
Други модели што се издвојуваат со резултатите во завршното тестирање годинава се Мазда Ц Икс 5, којашто доби високи оцени и за системите за аситенција, како и кинескиот Дипал С05, Порше Кајен и Фолксваген Т-Рок, сите со пет ѕвезди и со одлични резултати во заштитата на возрасни патници.
Еуро НКАП и годинава посочува на важноста возилата да поседуваат комплетна безбедносна опрема, што главно се однесува на системите за асистенција, укажувајќи на различните резултати при тестирањето на Киа ЕВ4 во изведба со стандардна опременост и изведба со со комплетна опременост.
Добри се и резултатите на Алпин А390, Џип Копмпас и Тојота Ајго Крос.
Зошто експертите на Еуро НКАП се толку одушевени од резултатите за Мерцедес ЦЛА
Производителите главно имаат позитивни ставови околу тоа што Конзорциумот воведува нови и построги барања на секои три години. На тој начин, Еуро НКАП ги поттикнува производителите да работат постојано на унапредување на безбедноста.
Мерцедес-Бенц им докажа дека производителите успеваат. Во 2019 година, претходната генерација на ЦЛА исто така беше прогласена за најдобра на тестовите.
Новиот ЦЛА задоволува 94% од барањата на Еуро НКАП за заштита на возрасни патници, што укажува дека и каросеријата и пасивните системи за заштита се делотворни. Високи стандарди достигнува и заштитата на децата, со 89 проценти од максимумот. Бодови носи и тоа што ЦЛА поседува сензори што откриваат дали е поставено детско седиште и ги исклучуваат воздушните перници што при отворањето би можеле да предизвикаат повреди.
ЦЛА ги заштитува од повреди и пешаците, велосипедистите или мотоциклистите, вклучувајќи соодветна работа на системите за асистенција.
Во 2026 година претстојат нови протоколи за тестирањата на Еуро НКАП, што ги става производителите пред нови предизвици.
Euro NCAP December 2025 star ratings
| Модел | Ѕвезди | Возрасни патници | Деца | Пешаци | Системи за асистенција |
| Alpine A390 | 4 stars | 74% | 85% | 80% | 77% |
| CHERY TIGGO 4 | 4 stars | 79% | 85% | 78% | 80% |
| Deepal S05 | 5 stars | 94% | 87% | 78% | 76% |
| EBRO s400 | 4 stars | 79% | 85% | 78% | 80% |
| EXLANTIX ET | 5 stars | 90% | 85% | 76% | 79% |
| GEELY STARRAY EM-i | 5 stars | 90% | 87% | 86% | 77% |
| Hyundai NEXO | 5 stars | 90% | 85% | 76% | 80% |
| Jeep Compass | 4 stars | 80% | 85% | 74% | 66% |
| Kia EV4 (standard safety equipment) |
4 stars | 84% | 85% | 77% | 67% |
| Kia EV4 (with optional Safety Pack) |
5 stars | 84% | 85% | 77% | 78% |
| Kia PV5 Passenger | 4 stars | 83% | 85% | 64% | 65% |
| MAZDA CX-5 | 5 stars | 90% | 89% | 93% | 83% |
| Mercedes-Benz CLA | 5 stars | 94% | 89% | 93% | 85% |
| MG MG4 EV URBAN | 5 stars | 87% | 85% | 85% | 80% |
| Mitsubishi Eclipse Cross | 5 stars | 83% | 86% | 82% | 70% |
| Porsche Cayenne | 5 stars | 91% | 89% | 81% | 79% |
| Renault Clio | 4 stars | 79% | 82% | 80% | 73% |
| Toyota Aygo X | 4 stars | 73% | 72% | 83% | 68% |
| Toyota Yaris | 4 stars | 72% | 84% | 83% | 72% |
| VW T-Roc | 5 stars | 91% | 87% | 87% | 77% |
