McLaren денес одбележа важно историско поглавје со почетокот на работата на новата фабрика во Јоркшир, во којашто ќе се произведуваат карбонски школки. Специјално за настанот пристигна McLaren Senna, кој направи крштевање на новите хали во типичен стил за марката – со цртање „крофни“ по подот.
Британскиот креатор на луксузни спортски автомобили и суперавтомобили, како што се опишува McLaren Automotive, денес имаше спектакуларно крштевање на новите производствени погони во Јоркшир. Шефот Мајк Флуит се појави со рачна светилка пред публиката во темната хала, осветлувајќи го логото на марката, како најава за настапот на McLaren Senna. Во стил што е сосем очекуван за марка која има израснато на тркачките патеки, суперавтомобилот остави неколку мајсторски изведени „крофни“ по подот во халата. Тоа беше крштевањето на MCTC, односно на Технолошкиот центар за композити на McLaren.
McLaren е единствената спортска марка што не сака да произведува теренец
Именуван по најголемиот возач во формула 1, Бразилецот Аиртон Сена, кој своите три титули ги освои во McLaren, новиот суперавтомобил беше придружуван од шампионскиот McLaren MP4/5 од 1989 година.
Јавноста за првпат доби пристап во новиот центар за композити вреден 50 милиони фунти. Центарот ќе почне да работи со полн капацитет во 2019 година. Тој е вториот производствен погон на McLaren, покрај матичниот во Вокинг. Околу 40 експерти моментно го усовршуваат процесот на производство на карбонски монокок, којшто е срце на секој автомобил на марката.
Од следната година, околу 200 лица ќе изработуваат лесни карбонски школки, коишто потоа ќе се испорачуваат во Вокинг, во погонот кадешто се врши рачната монтажа на автомобилите. Карбонот е еден од заштитните знаци на McLaren, кој првпат го примени во формула 1 во 1981 година. Оттогаш, карбонот е присутен во секој автомобил под нивното лого.