Меѓу десетте автомобили што најмалку ја загадуваат животната средина, девет модели секако дека користат чисто електричен погон, а нив им се придружува и еден приклучен хибрид.

По два електрични модели на Пежо и Опел, и една Тесла меѓу нив, ја сочинуваат победничката петорка. Тоа е билансот од сите 84 нови модели на автомобили, што германскиот клуб АДАК ги подложи на своите темелни тестирања во текот на минатата година.

Лани во Германија биле регистрирани 380.600 нови батериски електрични автомобили. Тоа е значително под резултатот од 2023 година, кога беа регистрирани 524.200 возила чисто на струја, но тогаш важеа и субвенциите што надминуваа 9.000 евра.

Клубот укажува на историската грешка што беше направена со укинувањето на субвенциите, напоменувајќи дополнително дека новите модели на електрични автомобили напредуваат од година во година. Затоа нив им припаѓаат и првите места во рангирањето на моделите според нивното влијание врз животната средина. Исто како и една година пред тоа, победниците на еко-тестот на АДАК во 2024 повторно беа чисто електрични автомобили.

Сите модели што клубот ги тестира, се мерат и оценуваат меѓу другото и во поглед на емисијата на штетни материи и во емисијата на ЦО2, што се испушта во животната средина, и тоа претставува основа за Еко-тестот на АДАК.

Првите осум места во 2024 им припаѓаат на чисто електрични модели, сите оценети со пет ѕвезди. Тоа што им дава дополнителна веродостојност на тестирањата на АДАК е фактот што електричните автомобили не се земаат предвид како возила што не испуштаат ниту грам ЦО2, туку се пресметуваат и вредностите на ЦО2 и на други штетни материи, што се ослободуваат при произведувањето на струјата. Во минатата година им се пресметуваше директната и индиректната емисија на 84 возила на тестовите во клубот.

Пежо и Опел прават победа еден-два за концернот Стелантис

Темата со електричните автомобили добива на смисол сé повеќе, со тоа што постојано се подобрува уделот на обновливата енергија што се користи во производството на електрична енергија, оценува АДАК конкретно за Германија. Секако дека помага и тоа што потрошувачката на енергија на самите електрични автомобили се смалува, како што доаѓаат новите генерации. Електричните модели од втора или трета генерација, докажано се поштедливи од постарите генерации модели.

Клубот заклучува дека „очигледно останува голем потенцијал во поглед на ефикасноста“. Добар пример за тоа се двата модели на врвот на Еко-тестот. Првата генерација на Пежо е-208 и на нејзе сродната Опел Корса-е (сега Корса Електрик), на Еко-тестот на АДАК во просек трошеа 18,7, односно 18,8 киловатчасови на сто километри. Со новиот погон, со нов електромотор и нова батерија, тие сега трошат по 16, односно 16,5 киловатчасови на секои сто километри.

Со вкупно 105 освоени бодови, Пежо е-208 е победник на еко-тестот во минатата година. Од просечната потрошувачка од 16,0 кВч на 100 км (вклучувајќи загуби при полнење) произлегуваат само 80 грами ЦО2 на километар. Веднаш по неа следи електричната Опел Корса, со 103 бодови.

Со ист број бодови и исто така на второто место следи уште еден модел на Пежо. Електричниот 308 го има истиот погон како 208, меѓутоа во автомобил од една класа погоре, што значи поголема каросерија и поголема тежина. Соодветно на тоа расте и потрошувачката на 16,3 кВч, што дава 82 грами ЦО2.

Веднаш по триото од Стелантис следи Тесла Модел 3. Лимузината од САД е на 4-то место, и како модел од средна класа, соодветно се качува и потрошувачката, на 17,2 кВч. Тоа дава емисија од 86 грами ЦО2, односно 100 бодови.

Тојота Приус како приклучен хибрид им парира на електричните модели во Топ 10

Тојота со својот Приус покажува дека и возилата со приклучен хибриден погон можат да им парираат на чисто електричните автомобили. Тоа е единствен модел со мотор во Топ 10. При чисто електричен погон, Приус троши 17,7 кВч/100 км и тоа е вредност што ниту еден друг модел со ваков погон не ја достигнува.

Кога ќе се исцрпи батеријата и возењето ќе продолжи со комбинација бензин-струја, јапонскиот автомобил пак останува штедлив. Доколку се појде со полна батерија, Приус ќе извози 100 км со 11,5 кВч струја и 1,7 литар бензин. Тоа дава биланс од 104 грами ЦО2. Доколку, пак, се поаѓа без полнење батерија, Тојота ќе троши само 4,8 литри бензин на сто км.

Пасат ја брани честа на дизел моторот со делотворното пречистување на издувните гасови

Најдобар дизел на еко-тестот на АДАК во 2024 е Фолксваген Пасат Вариант 2.0 ТДИ, со четири ѕвезди, пласиран на 38-то место. Заслугата за одбраната на честа на дизелите, од една страна е ниската потрошувачка од 5,0 литри, гледано според големината на моделот, но помага и делотворното пречистување на штетните материи во издувот.

На еко-тестот на АДАК се мерат главно две компоненти:

Од една страна се мерат штетните материи, како јаглероден моноксид (ЦО), честички ПМ и азотни оксиди (НОх). Над дозволената концентрација, сите се штетни по здравјето.

Друго што се мери е емисијата на стакленичкиот гас ЦО2. Тој во голема мера придонесува за глобалното затоплување и за климатските промени.

Колку е помала количината на овие два загадувачи, толку повеќе бодови се освојуваат. Максумумот во категоријата на штетни материи е 50 бодови, додека во поглед на ЦО2 е на 60 бодови. Тоа се прикажува соодветно со бројот на ѕвезди.

Ранг-листата на најдобри модели на еко-тестот на АДАК за 2024 година