Понудата од модели на баварците стана како телевизиска продукција за масовна публика. Со BMW X2 пристига шестата ситком серија во продукција на Минхен, во којашто на публиката ѝ се сервира докажаниот концепт на кросовер. Нема новитети во техниката, нема ниту хибрид, сé е само шминка.
Големите производители на автомобили веќе одамна не ни приредуваат изненадувања. Се работи строго според докажани формули, нешто слично на тв-серија, можеби не турска или шпанска не-памтам-дека-сум-го-родила серија, туку повеќе како американски ситком, со една софа и проблематични соседи.
BMW X2 е шестиот ситком во продукција на минхенската куќа, со познат заплет. На публиката ѝ се нуди вкрстен автомобилски концепт што го гледа светот околу себе од повисоко. Феноменот има логично објаснување. Произведувачите со малку трошок и уште помалку напор изведуваат навидум нов автомобил, но затоа ги враќаат трошоците неколкукратно. Изработката на кросовер чини неколку стотини евра повеќе, а крајната цена му е за неколку илјади евра повисока од нормална комбилимузина. Пазарот го „купува“ тоа, купувачите се среќни. Мамењето моментно наидува на добар помин. И смеењето во звучната кулиса во ситкомите е лажно.
BMW X2 не е автомобил што и Hyundai не би можел да го ископира
Во заплетот за X2 е различно тоа што возилото е за 8 сантиметри покусо и 7 сантиметри пониско од X1. Растојанието од подлогата е идентично, 18 сантиметри, исто како и меѓуоскиното растојание. Место 505 и 1.550 литри, багажникот во BMX X2 нуди 470 и 1.355 литри. Спуштањето на покривот за половина кат одзеде дваесетина килограми од тежината, пониското тежиште што резултира од тоа ќе се покаже во возните својства. Никаква наука за 21-ви век, уште во минатиот век Porsche 356 возеше поспортски од „бубата“.
Новитетот е во тоа што X2 ќе биде уште поскржав со просторот отколку X1, но и покрај тоа за него ќе се чека исто толку долго како за Q2. Лутиот изглед, постигнат преку доминантната висина на хаубата во контраст со ниските прозорци, не е последниот дизајнерски крик – Toyota уште пред една деценија избрза со Urban Cruiser.
Сите мотори се четирицилиндарски – освен трицилиндарецот од 1,5 литар за X2 sDrive18i. Купувачите на коишто им е важно да бидат меѓу првите, ќе мора да платат поскапо. Вообичаено за премиум-марките, понудата во почетокот ги вклучува посилните моделски изведби: X2 sDrive20i со погон напред, турбо-дволитарец со 192 КС и седумстепен менувач со двојна спојка, X2 xDrive20d и xDrive25d, со дволитарски дизел со 190 и 231 КС, осумстепен автоматик и погон на сите тркала.
Плагин-хибрид не се спомнува, BMW не сака во имиџот на X2 да фигурира било каква електрификација на погонската спрега. Тоа е чудна тврдоглавост, во време кога метрополи како Лондон или Париз веќе почнуваат да се збогуваат со моторите со внатрешно согорување. Реално чистата и реално штедливата погонска техника останува резервирана за обичниот ван од серијата 2.
„Највозбудливиот“ момент кај X2 е во тоа што бубрезите на BMW за првпат се пошироки во долниот дел и на задниот столб е залепено логото на марката
Очигледно дека во денешно време е полесно да се изостави погонска опција, отколку да се направи пропуст во конективноста или системите за асистенција. Во BMW X2 следуваат безжична мрежа, проекциски дисплеј, помошник за запирање и поаѓање во колона, дисплеј со големина до 8 инчи, кој целосно го „симнува“ паметниот телефон.
Продажбата стартува во март, со дволитарските модели. Цените за германскиот пазар: sDrive20i во стандардната изведба чини 39.200 евра, xDrive20d се добива за 43.800 евра, додека xDrive25d не е достапен во обичната верзија, туку стартува од 46.800 евра во линијата Advantage.