Дарко Јаконов
Шеста година избрани сопственици и колекционери на Ferrari се собираат на „кавалкада“ со своите скапоцени парчиња од Маранело. Стотина фераристи годинава возеа во Апулија, во чест на 70-та годишнина на марката.
Шестото издание на кавалкадата на Ferrari се одржа во италијанската Апулија во минатиов викенд. Нешто повеќе од стотина фераристи пристигнаа од целиот свет да учествуваат на ова патувачко шоу од единствен вид. На настанот можат да учествуваат само најверните клиенти и колекционери, кои секоја година ги посетуваат најубавите предели на Италија, Мисијата е една: Да се сподели страста за автомобилите од Маранело.
Ferrari цела година го одбележува јубилејот со низа настани
Базниот камп на кавалкадата беше организиран во Борго Егнација, ресорт во близина на Савелетри, во делот од јадранското крајбрежје што ги спојува Бриндизи и Бари. Учесниците оттука појдоа на нивната рута по питорескните краишта во овој дел од Италија, посетувајќи ги специфичните села и градови за регионот. Комбинацијата од медитерански шарм и патишта за уживање во возењето беше проследена и со духот на прославата на 70-годишнината на марката. Маранело годинава организира низа настани во чест на јубилејот од својот прв автомобил. Оттаму започна да се развива една од највозбудливите марки во историјата на автомобилизмот.
https://www.facebook.com/Ferrari/posts/10155233581761970
Тоа што учесниците пристигаат од преку 30 земји и од сите пет континенти го докажува тоа што било јасно отсекогаш. Ferrari е глобално позната и прославувана марка, страста за спортските машини од Маранело е подеднаква насекаде. Вредноста на автомобилите на собирот исто така е за внимание. Некои помалку, некои повеќе, вредноста на сите автомобили на кавалкадата надминнува 100 милиони евра.
На кавалкадата главно се возеа модели од последните годишта, почнувајќи од GTC4Lusso и F12tdf до California T и 488 Spider. Дијамант во круната беа неколкуте примероци од лимитираните моделски серии, како F40, F50 или Enzo. Секако дека на настанот учествуваше и LaFerrari Aperta, моделот што е изработен посебно во чест на седумдесетгодишнината на Ferrari.
https://www.flickr.com/photos/127653547@N06/35627195755/in/album-72157682888940093/
