Каде се произведуваат автомобилите, што Ауди, БМВ, Мерцедес, Фолксваген, ги продаваат во САД?

Овој детален преглед покажува од кои фабрики доаѓаат автомобилите што германските производители ги продаваат во САД. Некои производители сепак имаат голем удел на локална продукција, некои пак не произведуваат ниту еден автомобил што го продаваат на важниот пазар.

Царините за увозот на автомобили во висина од 25 проценти беа само почеток. САД предизвикаа општ пад на берзите откако воведоа високи царини. Ситуацијата може да доведе до рецесија, па и до светска економска криза.

Најсилно е погодена токму германската автомобилска бранша, гордоста на земјата. Ауди нареди престанок со испораката на свои модели за пазарот во САД. Исто како Порше, производителот од Инголштат не поседува ниту една фабрика во САД, за разлика од БМВ, Мерцедес-Бенц и Фолксваген.

За сите германски производители важи истото. Повеќето од автомобилите, што тие ги продаваат во САД, не се произведуваат локално. Следи детален преглед што прикажува каде се произведуваат автомобилите што германските марки ги продаваат од другата страна на големата бара. Користени се податоците за 2024 година.

Ауди, удел на локално производство во продажбата во САД: Нула проценти

Инголштат лани продаде околу 195.000 возила во САД, што е за 14 проценти помалку во споредба со 2023. Планот за годинава беше да се поттикне продажбата преку воведувањето нови модели, главно на пазарот во САД.

Тоа ќе биде проблем, доколку царините на Трамп останат на важност во подолг временски период. Шанса е да се искористи фабриката на Фолксваген во Чатануга, Тенеси, каде што досега се произведуваа само модели од матичната марка Фолксваген.

Фолксваген, удел на локално производство во продажбата во САД: 34,7 проценти

Секој трети автомобил што Волфсбург го продава во САД потекнува од фабриката во Чатануга. Но, најголемиот дел од продажбата, преку 60 проценти, пристигаат од фабриката на Фолксваген во Пуебла, Мексико.

Три од четирите најпродавани модели на Фолскваген во САД, меѓу кои и најпродаваниот, Тигуан со продолжена каросерија, се произведуваат во соседната земја.

Порше, удел на локално производство во продажбата во САД: Нула проценти

Спортската марка ги произведува во Европа сите свои автомобили што ги продава на пазарот во САД, а повеќето од нив во Германија. Истото важи и за деловите во возилата.

Поради тоа, царините повеќе го погодуваат Порше. Но, тоа е само едната страна од приказната. Другата страна вели дека главнината од купувачите на Порше се добростоечки и поради тоа не се толку чувствителни на цените, како што тоа е случај со купувачите на Фолксваген Џета, на пример.

Меѓутоа, најпродаван модел е Макан. Според вебсајтот на Порше, неговиот ценовник почнува од 63.000 долари. Тоа сепак е ценовна класа, во којашто купувачите повеќе гледаат на цената.

Мерцедес-Бенц: удел на локално производство во продажбата во САД: 40,7 проценти

Со својата фабрика во Таскалуза во сојузната држава Алабама, Мерцедес-Бенц покрива голем дел од продажбата во САД. Повеќето автомобили сепак пристигаат од Германија (45,7 проценти).

САД учествуваа со 14 проценти во продажбата на Мерцедес-Бенц во 2024 година. Во првото тромесечје од годинава, Северна Америка беше меѓу малкуте пазари, на коишто марката со ѕвезда постигна раст во продажбата.

БМВ, удел на локално производство во продажбата во САД: 46 проценти

За разлика од своите германски конкуренти, БМВ не ја двои продажбата во САД по модели. Но, факт е дека фабриката во Спартанбуирг е најголема фабрика на марката од Минхен во светски рамки.

Според БМВ, лани од фабриката се извезени околу 225.000 возила, што претставува 57 проценти од нејзината вкупна продукција. Во САД се продадени околу 170.000 примероци од моделите од сериите Икс, што одговара на 46 проценти од вкупната продажба на БМВ, што брои 371.000 возила.

[the_ad id=”85764″]