Mitsubishi Outlander PHEV надмина 100.000 продажби во Европа

Фев 10, 2018

Во четвртата година од неговото пристигање на пазарот, Mitsubishi Outlander PHEV ја достигна звучната бројка од 100.000 продадени примероци на европскиот пазар. Кросоверот со плагин хибриден погон во меѓувреме учествува со повеќе од 10% во вкупната продажба на марката на континентот.

Во почетокот, Outlander PHEV беше достапен само во Холандија и во скандинавските земји, како европски лидери во електромобилноста, но набрзо се покажа дека и на останатите пазари има голем интерес за тогаш единствениот кросовер со плагин хибриден погон. Во изминативе три години, тој е најпродаван модел со овој вид на погон во Европа.

Тоа што Toyota RAV4 Hybrid и Lexus NX 300h се меѓу хибридите во сегментот, Mitsubishi Outlander PHEV е меѓу плагин-хибридите

Конкурентите во меѓувреме почнаа да реагираат и на Outlander му се придружија Mercedes GLC / GLC Coupe и Volvo XC60, но јапонскиот автомобил го задржува водството. Имајќи предвид дека овие два модела се од премиум сегментот, Outlander практично е единствен кросовер со плагин хибрид во средната класа. Лани, тој беше најпродаван PHEV-модел во Велика Британија, Норвешка и Шпанија.

Според Mitsubishi, кросоверот со PHEV погонска технологија е сублимат од останатите пионерски чекори на марката: Погон на сите тркала во 1936, електричен погон во 1966 и спортски теренец во 1982 година.

Швајцарецот Феликс Еголф пред четири години извозе 700 километри со само 40,55 литри бензин, постигнувајќи просечна потрошувачка од 5,79 литри гориво на сто километри. Еден Велшанин го користи Outlander PHEV за надгледување на своето стадо овци, заради тивкиот погон, кога кросоверот вози на батерии.

Топ 10 пазари за Mitsubishi Outlander PHEV во Европа

(меѓу октомври 2013 и декември 2017)

	Држава	Примероци
1	Велика Британија	34.108
2	Холандија	25.399
3	Норвешка	13.429
4	Шведска	9.957
5	Германија	6.743
6	Франција	2.580
7	Шпанија	1.941
8	Швајцарија	1.321
9	Португалија	795
10	Белгија	725