Дарко Јаконов
Наоѓање паркинг и плаќање, работно биро зад воланот, лична секретарка и поврзување со домот – сите тие услуги во иднина ќе бидат достапни во Volkswagen. Во развојот ќе помага Microsoft
Volkswagen склучи стратешко партнерство со Microsoft, за заеднички развој на голем индустриски облак, којшто ќе ги опфаќа идните дигитални услуги и решенија за мобилност на германската марка. Исто како останатите водечки производители на автомобили, Volkswagen во блиска иднина ќе нуди и нови услуги за мобилност, базирани врз дитигална техника. „Облакот“ е важен чекор во тој правец, затоа што ќе овозможи сите автомобили во возниот парк да бидат поврзани во една мрежа.
Според шефот на концернот Херберт Дис, „стратешкото партнерство со Microsoft е турбо за нашата дигитална трансформација.“ Од двата моќника во различните бранши се очекува да имаат централна улога во креирањето на иднината на мобилноста. Првиот човек на Microsoft, Сатја Надела, ја оценува соработката: „Пазарните лидери во цел свет го избираат Microsoft и се радуваме што Volkswagen се реши за Microsoft. Ние заеднички ќе го дефинираме возачкото искуство одново, за луѓето низ целиот свет.“
Со моделите од новото електрично семејство I.D. пристигаат и новите дигитални услуги во Volkswagen
По 2020 година ќе се продаваат по пет милиони нови автомобили од марката Volkswagen годишно, коишто ќе бидат целосно вмрежени и со тоа ќе претставуваат дел од таканаречениот „Internet of Things“ (IoT). Партнерството во почетокот има за цел да се создаде основата за автомобилскиот облак. Сите услуги во возилата од марката Volkswagen, како и дигиталната архитектура One Digital Platform, којашто ќе биде достапна за сите марки од концернот и базирана е на облак, во иднина ќе се создаваат врз основа на Azure, како што се нарекува облак-платформата на Microsoft, и ќе се користат услугите што ги нуди платформата, како Azure IoTEdge. Тој ќе овозможи поедноставување на техниката.
Грижа околу роковите за сервисирање, обновување и надградба на софтвер, преземање, пристап до функции и услуги, медиа-стриминг, барање паркинг и плаќање, лична секретарка, предвидување, подвижно биро, поврзување со паметен дом – сето тоа ќе биде достапно во моделите од матичната марка Volkswagen од 2020 година, а потоа и во останатите марки од концернот
Договорено е Volkswagen да основа нов развоен центар за автомобилскиот облак, во близина на седиштето на Microsoft во САД. Софтверскиот гигант ќе се погрижи околу привлекувањето на стручниот кадар, како и околу управувањето со проектот. Во центарот во иднина ќе работат околу 300 ИТ-специјалисти.
Решенијата кои ќе произлезат од партнерството, понатаму ќе се користат и во останатите марки од коцернот, на глобално ниво. На тој начин, таканаречениот автомобилски облак на Volkswagen ќе претставува основа за сите дигитални услуги и понуди на марките од концернот. Тоа се однесува на моделите од идното семејство електрични автомобили I.D., како и на автомобилите со обичен погон.
