Лимузинската изведба на Renault Megane се продава на близу триесет пазари, градејќи го глобалниот карактер на француската марка. Класичната каросериска изведба на компактот на Renault доби моделско освежување со неколку зафати во изгледот, заедно со нова технологија за повеќе безбедност и комфор.
Новата лимузинска изведба на Renault Megane ќе се препознава лесно по светлата, кои се 100% Pure Vision LED и покрај тоа што одлично го осветлуваат патот, придонесуваат и за впечатливиот изглед, со формата на потковица.
Предниот браник е сменет, заедно со маската, вклучувајќи хромирани додатоци. Отстрана исто така се забележуваат новите браници, но и новото осветлување на рачките на вратите. За каросеријата се достапни седум бои, новина е хајленд-сивата. Стилот го заокружуваат тркала со нов дизајн, со пречник меѓу 16 и 18 инчи.
Инструментите се дигитални, со пречник од 10,2 инчи и со прикажување на навигацијата, заради подобра прегледност и полесно користење. Средишниот дисплеј во поопремените изведби има пречник од 9,3 инчи и двојно е поголем од претходно. Обновени се можностите за поврзување и користење на преносни уреди.
Командите за климатизацијата имаат хромирани украси, сменети се и облогите на седиштата. За возачкото седиште може да се избере опција за електрично местење.
Со посилните мотори од понудата следи и избор на четири програми на возење – еко, комфор, спорт и MuSense. Во програмите за возење сега се вклучени и осветлувањето на кабината и генерирањето звук на мотор.
Меѓу новите системи за асистенција се вбројува приспособливиот темпомат со самостојно запирање и поаѓање во колона. Автоматското запирање сега реагира и при пешак на патот, додека сензори назад предупредуваат кога при излегување наназад наидува возило.
Проширена е понудата од мотори, којашто воедно е доведена во согласност со стандардот Euro 6D Full. Бензинците почнуваат со 1.0 TCe со 115 КС и мануелен менувач, по него следи 1.3 TCe со 140 КС, дополнително во комбинација со 7-степен менувач со двојна спојка. Од дизелите е достапен единствено 1.5 Blue dCi со 115 КС, кој исто така може да се нарача со 7-степен EDC.
Пазарите на коишто се нуди лимузинскиот Renault Mégane се Саудиска Арабија, Бугарија, Хрватска, Египет, ОАЕ, Естонија, Унгарија, Ирска, Израел, Латвија, Литванија, Мароко, Полска, Портуигалија, Чешка, Романија, Србија, Словачка, Тунис, Турција и Украина. Во официјалното соопштение недостига македонскиот пазар.
Производството во фабриката во Турција ќе започне во 2021 година.