Најценетата награда во автомобилската бранша во Европа нема да се доделува годинава. Поради темната сенка што ја остави дизел скандалот, жирито реши да не ги одликува производителите со Златен волан
Повеќе од четири децении, производителите на автомобили и публиката во Европа очекуваат магазинот Ауто Билд и германскиот неделник Билд ам Зонтаг да ги доделат наградите за најдобрите и највпечатливите достигнувања во браншата. Водечкиот магазин за автомобили во Европа уште од 1976 година ја доделува наградата Златен волан, заедно со неделникот Билд ам Зонтаг.
Како причина за овој чекор, од издавачката куќа Аксел Шпрингер ги наведуваат последните случувања околу мамењето со издувните гасови. Издавачот цени дека делови од автомобилската бранша и натаму се наоѓаат во неопходната трансформација, којашто спротивно од очекувањата уште е далеку од завршницата. „Во интерес на нашите читателки и читатели, годинава не можеме со новинарска веродостојност да доделуваме награда за најдобрите автомобилски новитети,“ се наведува во соопштението од издавачот на Ауто Билд.
Главниот уредник на магазинот, Том Дрекслер: „Да нема двоумење: Ние ги сакаме автомобилите. Луѓето кои нив ги произведуваат, купуваат и возат се наши клиенти, наши читатели. Но, сега не е време да се доделуват награди и да се прославува.“ Како што понатаму посочува Дрекслер, прескокнувањето на доделувањето на наградата Златен волан во 2018 година дава јасен знак и на погодените производители им дава време да ги најдат вистинските одговори во темелни структурни промени.
Лани титулата Златен волан ја освоија:
Opel Ampera e, во компакт класата
Skoda Karoq, во класата на компактни СУВ модели
Audi Q5, во класата на големи СУВ модели
Volkswagen Arteon, во средната и вишата класа
Porsche Panamera Sport Turismo, во класата на спортски автомобили
Aston Martin DB11, како најубав автомобил