Дарко Јаконов
Безбедноста обично е првата помисла кога се зборува за Volvo. Во таа смисла, за да им обезбеди заштита на своите идни и сегашни клиенти, шведската марка понуди нов начин за посета на салонот на Volvo во Скопје.
Во овие вонредни состојби околу пандемијата, може да се стекне впечаток дека многу бизниси мируваат и чекаат подобри времиња, но тоа би бил погрешен впечаток. Тимот на Премиум АГС, компанијата којашто во своето портфолио меѓу другото ги вклучува и марките Volvo и Kia, претходно изненади пријатно со организирањето на виртуелната посета на салонот.
Истата технологија и сличен концепт сега се применува и за премиум марката Volvo. Целта, секако е да се обезбеди заштита на здравјето на клиентите. Токму вонредната ситуација околу вирусот-корона доведе до тоа многу технологии што постојат и се најавуваат, нагло да добијат на „смисла“ и да ја покажат новата димензија на функционалност.
„Со оглед на ситацијата, ваквиот тип на претставување на автомобилите е повеќе од добредојден“
Во соопштението од Премиум АГС се наведува дека „со оглед на ситацијата која ја поминуваме во изминатиов период, ваквиот тип на претставување на автомобилите е и повеќе од добредојден. Оваа актуелност, повеќе пати е применета од страна на големи светски брендови, а отсега е достапна и кај нас.“
Со пристапување на веб страната, посетителите можат детално да разгледаат повеќе модели од актуелната понуда на Volvo. Во виртуелната реалност се вклучени целата XC гама, како и S60, V60CC и V90CC. Покрај тоа што автомобилите може да се погледнат буквално од секој агол, на виртуелниот приказ се наведени и посебни точки со објаснување на опремата што се гледа или на одредена функција.
Уште една предност е тоа што до салонот може да се пристапи во било кое време и од било кое место. Веб-страната е веќе добро позната www.volvocars.mk.
