Дарко Јаконов
Четири шефови во иднина ќе одговараат посебно за својата група модели во понудата на марката Volkswagen. На тој начин ќе се постигне подобра прегледност на одговорностите и ќе се спречуваат идните „дизајгејти“.
Од почетокот на годинава, понудата на модели на Volkswagen е поделена на четири групи, со посебен шеф за секоја група. По еден човек во иднина ќе одговара за развојот на секој модел од својата група, од почетокот до крајот на моделскиот век, како и за техниката, квалитетот, трошоците и профитабилноста. Одговорностите порано се распределуваа во различни сектори на претпријатието и постоеше извесна неодреденост околу истите.
Во првата група се опфатени помалите модели, како Up и Polo, вклучувајќи ги сите нивни каросериски изведби. Одговорен за овие возила е Клаус-Герхард Волперт, кој од 2010 година раководеше со менаџменот на моделите на Volkswagen и на целиот концерн.
Во компакт-групата се наоѓаат сите моделски изведби на база на Golf, а со оваа стратешки клучна група ќе раководи Карлхајнц Хел, кој претходно беше задолжен околу набавката на електрични и електронски компоненти за концернот. Третата група ја сочинуваат модели од средната и поголемите класи, односно од Passat, преку Sharan, до Touareg. Шеф на оваа група е Елмар-Мариус Лихарц, досега одговорен за контрола на производите во марката Volkswagen.
Како четврта посебна група се издвојуваат моделите со електричен погон, во којашто моментно припаѓаат E-Up и E-Golf. Идните модели во оваа група ќе располагаат со значително поголем досег во споредба со актуелните, а Volkswagen веќе го прикажа овој погонски концепт во студијата Budd-e. Со оваа група ќе раководи некогашниот шеф на одделението за автомобилска техника во Continental AG, Кристијан Зенгер.
