Тоа што изгледа како концепт од иднината од салонските штандови е скутер со погон на струја кој наскоро стартува со продажба. Ujet е развиен во Русија, производството е во Луксембург. Изобилството од напредна технологија сепак има своја цена.
Иновациите во светот на две тркала обично не пристигаат од Русија или Луксембург, но токму овие земји го понудија веројатно најнапредниот скутер во историјата. Зад развојот на Ujet стои рускиот технички концерн Oscial, кој пред три години основаше компанија во Луксембург посебно за производство и продажба на електричниот скутер.
Ujet има лесна конструкција, што се нагласува и со дизајнот. Највпечатливиот детал сепак се орбиталните тркала, со интегрирани сопирачки дискови и со една водилка. Материјалите се исклучиво карбон и алуминиум. Затоа и не изненадува тоа што тежината изнесува 43 килограми, барем во верзијата со помала батерија. Има уште една финта: Скутерот долг одвај повеќе од 1,5 метар има посебен механизам за склопување, со што се преполовува должината. На тој начин Ujet може да се понесе со себе до работното место или домот, или да се остави колку е можно поблиску до одредиштето. Потпрен на малечки држачи, скутерот стои исправено и стабилно.
Отстранливата батерија на Ujet може да се понесе со себе и да се користи за напојување електрични уреди
Електромоторот располага со 5,5 КС и 90 њунтметри. Тоа ветува пристојни перформанси и темперамент во возењето. Место има само за возачот, носивоста е ограничена на 120 килограми. Крајната брзина вообичаено се држи на 45 km/h.
Батеријата се отстранува и со помош на малечки тркала може да се пренесе до најблиската приклучна кутија. Постојат две варијанти на батеријата, помала за досег до 70 километри и поголема за 150 километри. Како опција се нуди брз полнач, кој ја освежува помалата батерија за 1,5 час, односно двојно подолго во случај на поголемата батерија.
Секако дека не смеат да недостигаат можности за поврзување. На располагање стојат 3G сим-картичка, GPS, WiFi и блутут. За отклучување служи посебна мобилна апликација. Таа воедно се користи и за лоцирање на Ujet, за проверка на наполнетоста на батеријата или за вклучување на заштитата од кражба.
Информациите за возењето се прикажуваат на голем дисплеј, вклучувајќи и податоци за навигација, музички стриминг и телефон, како и слика од предната камера со висока резолуција. Со дисплејот се ракува преку посебни копчиња на воланот.
Ujet in the spotlight: based on its construction, our electric scooter is robust and lightweight making it highly convenient to handle and store e.g. in the trunk of your car! http://bit.ly/2qG2DNY CES
Posted by Ujet on Thursday, January 11, 2018
Сета оваа технологија чини близу 8.690 евра, за верзијата со помала батерија. За екстра енергија треба да се доплати уште 1.200 евра. Резервацијата чини 850 евра, испораките на европскиот пазар ќе стартуваат налето.