По успехот со Street Triple и Tiger 800, британската марка Triumph се впушта во нов обид со моделите Commander и LT. Во класата на крузерите, ретки се тие што може да се спротивстават на новите модели на Triumph.
На Triumph му оди одлично во последниве години. Англиската марка секогаш имаше нос за актуелните и за идните трендови на пазарот и понуди мотоцикли што совршено се вклопуваа во истите. Street Triple 675 веќе со години е репер за уличните фајтери од средно тешката категорија, додека Tiger 800 остави белег кај универзалните таленти во средната класа.
Во оваа година инженерите на Triumph им се посветија на класичните модели и ги освежија како Bonneville, Thruxton и Scrambler со мотори со поостар звук, со ново седиште (Bonneville, Scrambler), нови бои (Speedmaster, Scrambler), разладни ребра и хромирана заштита на синџирот (Thruxton).
Паралелно со тоа Triumph претстави и два нови крузера. На Thunderbird Storm му се придружија Commander и LT (од Light Touring), коишто се разликуваат во геометријата на подвозјето и во позицијата на возачот. Commander и LT го користат линискиот двоцилиндарец од 1.699 сантиметри кубни од Storm, кој што во новите сестрински модели развива 94 КС и дебел вртежен момент од 151 њутнметар.
Разлики има и во опремата. LT има кожени торби отстрана, отстранлив ветробран, двојни дополнителни светла и вози на радијални гуми со бели страници. Додека LT тежи дури 380 килограми, Commander покажува на вага само 348 кила. Како поевтина алтернатива и натаму се нуди America, којшто исто така е достапен во верзија LT. Таму работи моторот од Bonneville, линиски двоцилиндарец со 61 КС. America исто така е освежена во новото моделско годиште, со голема педала за сопирање на потпирачите, повеќе хромирани делови и нови бои. Верзијата LT поседува отстранив ветробран и водоотпорни кожени куфери.