Во фабриката на Toyota во Санкт Петерсбург од август ќе стартува производството на новиот RAV4. Со зголемувањето на локалната продукција ќе се зацврсне позицијата на марката на кризниот руски пазар.
Toyota RAV4 од август ќе се произведува и во фабриката во Санкт Петерсбург, од каде што ќе се покриваат пазарите во Русија, Казахстан и Белорусија. Во фабриката моментно се произведува Camry за рускиот пазар. Со овој чекор, јапонската марка продолжува со остварувањето на планот, продукцијата да се одвива таму кадешто е пазарот, заради побрза испорака на возилата. Пред две недели, Toyota потврди дека стартува со производство на новиот кросовер C-HR во Турција. RAV4 е деветтиот модел на Toyota што се произведува во Европа, покрај Avensis, Auris, Yaris, Aygo, Camry, Corolla, Verso и Toyota C-HR.
Во руската фабрика ќе се инвестираат дополнителни 90 милиони евра за новиот модел, со што вкупната инвестиција на Toyota ќе достигне 233 милиони евра, а производствениот капацитет ќе се зголеми од 50 илјади на сто илјади возила годишно. Со модернизацијата на фабриката ќе се удвои и брзината на производствената лента. Новиот модел во Санкт Петерсбург ќе отвори и 800 работни места.
Во минатата година Toyota достигна рекорден удел од 7,5 проценти на рускиот пазар, во услови на длабока криза, којашто остава најголеми траги врз марките што немаат локално производство во големата земја.