Двете јапонски марки најавија продлабочување на меѓусебната соработка. Toyota има интерес да ги користи моторите на Mazda, додека оваа за возврат ќе добие помош при развојот на новите модели.
Јапонските производители на автомобили Toyota и Mazda ја продлабочуваат соработката. Според официјалното соопштение, во рамките на долгорочното партнерство „ќе произлезат уште попривлечни автомобили, преку меѓусебното надополнување и усовршувањето на продуктите и технологиите.“ Целта е да се постигне широка соработка на повеќе полиња, вклучувајќи и еколошки и безбедносни технологии. Обата производитела не дадоа конкретни податоци во тој поглед.
Хибриди за Mazda, фабрика во Мексико за Toyota
Двата автомобилски концерни веќе имаат реализирано соработка. Mazda ја користи хибридната технологија на Toyota во своите модели за јапонскиот пазар, додека во фабриката на Мazda во Мексико се произведуваат компактните модели на Toyota. Според наводите на претпријатијата, последнава спогодба ги надминува традиционалните рамки на соработка и има поставено цел „да создаде цела низа нови вредности на возилата“.
Од соработката ќе профитираат обете марки. Со 1,4 милион продадени возила во минатата година, Mazda се вбројува меѓу помалите производители на глобално ниво и има потреба од партнер во развојот на новите возила и технологии. „Десетмилионската“ Toyota, пак, во развојот на погонот се концентрираше исклучиво на хибридната технологија и го запостави интензивниот развој на конвенционалните мотори, па ќе профитира од бензинците и дизелите од генерацијата Skyactiv на Mazda.