Дарко Јаконов
Total го доби најголемиот тендер за полначи за струја за електрични автомобили во Европа. Нафтената компанија победи на тендерот на асоцијацијата за електричен погон MRA-E, со когошто се предвидува поставување и управување со 20.000 нови станици за полнење во следните години, во трите холандски провинции Норд-Холанд, Флеволанд и Утрехт.
Со новиот проект се излегува во пресрет на рапидно зголемената потреба за станици за полнење на електрични автомобили во Холандија. Мрежата од полначи за возила на струја што ќе ја гради Total опфаќа површина на којашто живеат 3,2 милиони жители и покрива околу 15% од моментната потреба од станици за полнење на електрични возила.
Total веќе има искуство во поставувањето и менаџирањето со големи мрежи од јавно достапни полначи за електрични автомобили. Специјализираниот огранок на Total, со име PitPoint, досега има поставено повеќе од 4.500 јавни полначи за струја во трите холандски покраини што се под надлежност на партнерството за електромобилност MRA-E и со тоа се вбројува меѓу водечките компании во ова подрачје во земјата.
Електричната енергија што ќе биде достапна на новите полначи потекнува 100% од обновливи извори, односно од енергијата на сонцето и на ветерот. Total воедно ќе продолжи да инвестира во изградбата на капацитети за обновлива енергија во регионот.
