Американскиот специјалист за погон на струја стартува со продажба на новата основна верзија на Model S. Електричната лимузина има поголем досег, погон на сите тркала и моќност од преку 330 КС.
Tesla Motors стартуваше со продажба на новата основна верзија во гамата на Model S. Исто како во најсилната изведба, буквата „D“ во ознаката на Model S 70D означува „dual-motor“, што не значи ништо друго освен дека станува збор за погон на сите тркала. Литиум јонските батерии сега имаат капацитет од 70 киловатчасови, што според нормите е доволно за 442 километри пат. Едниот електромотор е задолжен за предната оска, а вториот за задната оска. Распределбата на моќноста од двата мотора се врши електронски во зависност од условите на патот. Во споредба со топ-моделот P85D, моќноста е преполовена. Со 334 КС, Model S 70D забрзува до сто за 5,4 секунди, а крајната брзина изнесува 225 километри на час.
Новиот модел е замена за претходникот Model S 60, којшто имаше батерии со капацитет од 60 киловатчасови. Вообичаено за Tesla, во опремата ништо не недостига ниту во новиот основен модел: Навигација, систем за следење лента, самостојно запирање при опасност на патот, пристап без клуч, а покрај тоа и бесплатно полнење на батериите и систем за автоматско возење. Новата верзија ја поседува софтверската верзија 6.2, со којашто се добива можност сопствениците да го обновуваат софтверот преку интернет, односно да додаваат нови функции на возилото и да преземаат мапирања на погонската спрега. Новитет во понудата се и трите нови бои. Цената во САД изнесува 75.000 долари.