Suzuki Jimny доби златна награда за дизајн на манифестацијата што ја организира јапонското министерство за економија, трговија и индустрија. Тоа е единствениот настан од овој вид во земјата
Suzuki Jimny доби златна награда на овогодишното одликување на најдобрите дизајни, коешто го организира јапонското министерство за економија, трговија и индустрија. Златната награда за добар дизајн спаѓа во специјалната категорија награди и се избира меѓу стоте производи што се издвојуваат особено со својот дизајн. Ова е првпат модел на Suzuki да ја освои златната награда за добар дизајн.
Станува збор за традиционална манифестација за одликување на производите со добар дизајн, којашто се одржува уште од 1957 година. Тоа е единствениот сеопфатен систем во Јапонија што го оценува и го препорачува добриот дизајн.
Suzuki Jimny е дизајниран како „алат за професионалци“
Продажбата на новата генерација на Suzuki Jimny на јапонскиот пазар започна во јули годинава, а моделот од минатиот месец се нуди и на нашиот пазар. Според дизајнерите на јапонската марка, новиот Jimny комбинира едноставен дизајн и висока функционалност, како „алат за професионалци“. Коцкестата форма на каросеријата му помага на возачот полесно да ја одреди позицијата на возилото на теренот, а воедно му овозможува и подобра претстава за димензиите на возилото.
Жирито посебно го цени тоа што Jimny го задржа препознатливиот стил од претходните генерации на моделот. Подеднакво популарен и ценет беше и моделот од пред две генерации, познатиот SJ или Samurai.