Suzuki станува дел од Hakuto-R, првата комерцијална програма за истражување на Месечината. Производителот на автомобили ќе учествува во развојот на техниката на „роверот“, особено во механизмот за приземјување, како и во компактноста на возилото.
Корпорацијата Suzuki и ispace, компанија за истражувања на Месечината со седиште во Токио, објавија дека производителот на автомобили станува партнер во Hakuto-R, првата комерцијална програма за лунарни истражувања.
Клучната улога на Suzuki ќе биде структурната анализа што производителот ја користи за тестирање на своите автомобили, којашто ќе се примени во развојот на Hakuto-R, посебно во механизмот за приземјување и во амортизацијата, како и во носечките делови во структурата на возилото.
Специјалноста на Suzuki во изработката на компактни и издржливи возила ќе биде клучна и за развојот на возилото за приземјување на Месечината. Suzuki ќе ги анализира сите сценарија на приземјување и соодветно ќе го конструира механизмот за приземјување.
Претседателот Тошихиро Сузуки го коментира проширувањето на партнерството: „Чест ни е да дадеме придонес во Hakuto-R, во нивните стремежи за остварување на сонот за приземјување на Месечината. Бидејќи основната вредност на Suzuki е придонес во напредокот на општеството преку производството на малечки автомобили, го продолжуваме партнерството со Hakuto-R, започнато во 2016 година и ја подржуваме експанзијата на човечката цивилизација на Месечината.“