Ниту еден спој повеќе не звучи необично. Теренец може да биде спортски, а спортски теренец може да биде со погон на струја. Холандскиот Spyker наскоро ќе му се спротивстави на Tesla Model X.
За холандскиот производител Spyker повторно се зборува на автомобилската сцена. Ексклузивната мануфактура наводно подготвува спортски теренец со електричен погон и тој би бил подготвен за премиера кон крајот на годинава, на салонот во Лос Анџелес во ноември. Покрај верзијата со електричен погон ќе се нуди и изведба со бензински мотор. Имајќи ги во предвид стандардите на Spyker, бензинецот најверојатно ќе биде дванаесетцилиндарец.
Овие и уште многу детали остануваат да се откријат до премиерата во ноември. Најавата за спортски теренец од Spyker не е изненадување. Холанѓаните уште пред десет години го изработија концептот D8 Peking-to-Paris, кој не доживеа да биде реализиран во конечен производствен модел. Но, времињата се менуваат. Пазарот за ексклузивни спортски теренци штотуку се отвора.