Нов малечок СУВ, иден кросовер со погон на струја, тркачка машина и електричен велосипед. Тоа се актерите во „претставата“ на Skoda за публиката на салонот во Женева. На публиката обично ѝ се допаѓаат изведбите на чешката марка. Всушност, сé повеќе.
Без изненадувања, затоа што сé беше уредно најавено долго пред почетокот на салонот за автомобили во алпската земја, а сепак привлечно и масовно посетено. Skoda има четири новитети за светската автомобилска сцена: Skoda Kamiq, малечок СУВ и брат на Seat Arona и VW T-Cross, потоа концепт Vision iV кој го најавува идниот кросовер и прв модел на Skoda со електричен погон, свежа верзија на Skoda Fabia R5, како најуспешен рели-автомобил во историјата на марката, а како најголемо изненадување, велосипед со погон на струја.
Најголемата инвестиција во историјата на Skoda оди за електрични автомобили и услуги за мобилност
Skoda во следните четири години ќе вложи две милијарди евра во електрификација на погонската спрега и во нови услуги за мобилност. До крајот на 2022 година, Чесите ќе нудат десет модели со електричен или електрифициран погон. Паралелно ќе се воведуваат и услугите за користење на јавниот возен парк HoppyGo или за споделување превоз CareDriver. Возилата на Skoda уште сега се вклопуваат во домовите со паметна корисничка мрежа. Во иднина, повеќе.
Skoda Vision iV е конкретна најава за серискиот модел кој ќе се појави најдоцна до 2022 година и ја користи модуларната платформа за електричен погон MEB на концернот Volkswagen. Компактниот и флексибилен електричен погон дозволува многу простор во кабината и нејзино поразлично изведување. По еден електромотор работи на секоја оска, а тенка литиум-јон батерија е поставена под целиот под. Таа овозможува досег до 500 километри.
Kamiq е чешката варијанта на Seat Arona и VW T-Cross, и чисто субјективно, изгледа најубедливо и најпривлечно во триото. Верно на поголемите модели Karoq и Kodiaq, името почнува со K и завршува со Q, а потекнува од јазикот на Инуитите, кои живеат на Гренланд и на северот на Канада.
Првите пазари ќе ја добијат новата Skoda Scala веќе во април
Секако дека на штандот привлекува внимание и новата Skoda Scala, како наследничка на Rapid Spaceback, врвно стилизирана, со многу можности за индивидуализација. Генерално, Skoda похрабро го приближува својот модел во компакт класата до Golf. Моторите достигнуваат до 150 КС, испораката ќе започне во април.
Бидејќи целиот штанд е „под напон“, одлично се погоди и претставувањето на електричниот велосипед Klement. Во иднина повеќе ќе се развива принципот на микромобилност, односно користење превозно средство за преостанатиот пат до самото одредиште, откако ќе се дојде до одредена точка со користење јавен превоз или на новите услуги за мобилност. Крајната брзина изнесува 45 km/h, две батерии овозможуваат досег од преку 60 киломоетри. Секако не отсуствува и можност за вмрежување и вклучување на мобилните апликации на корисникот. Интересна можност е ограничувањето на зоната на движење. Надвор од одредена зона, погонот не функционира.
Фабриката за Skoda Kodiaq и Superb првпат надмина 300.000 возила
Skoda Kamiq скроен по мера и со опција за метан
Skoda Vision iV прикажува сосем различна внатрешност
Skoda во јануари испорачала над 100.000 возила