„Мечката“ на Skoda уште е свежа на пазарот, а веќе се најавува следниот модел во офанзивата на чешката марка. Karoq уште вози маскиран, но во средината на мај ќе се покаже пред јавноста на премиерата во Стокхолм. Нов е 1,5-литарскиот бензинец со 150 КС и исклучување на дел од цилиндрите, за првпат се нуди и дигитална табла со инструменти.
Третиот модел во бранот компактни кросовери од концернот Volkswagen пристига под знакот на Skoda. Техничкиот сродник на Seat Ateca и Audi Q2 доаѓа на местото на Yeti и го носи моделското име Karoq. Дизајнот го следи стилот на поголемиот Kodiaq, заедничката платформа со Ateca, Q2 и идниот кросовер врз база на Golf обезбедува просторна кабина и голем багажник, на тоа се надоврзуваат освежена понуда од системи за асистенција и диодни светла, а за првпат во Skoda и дигитална табла со инструменти. Кросоверот се појавува маскиран на првите фотографии од Skoda, како интересен детал во изгледот се забележуваат двете светла со правоаголна форма под главните светла – како надградување на стилот на Kodiaq и на освеженото моделско годиште на Octavia.
Пет мотори стојат на располагање во Karoq, во дијапазон на моќност од 115 до 190 КС, вклучувајќи го и новиот 1,5-литарски TSI со 150 КС. Приспособливата задна клупа и отворањето на задниот капак преку замавнување со стопало под браникот се актуелните ставки што одат во прилог на пропагираната практичност на моделите на чешката марка.
Каросеријата е долга 4.382 милиметри, широка 1.841 и висока 1.605 милиметри. Меѓуоскиното растојание изнесува 2.638, односно 2.630 милиметри во верзија со погон на сите тркала. Од дополнителните 19 милиметри во должината на каросеријата наспроти Ateca произлегува и за единаесет литри поголемиот багажник во споредба со шпанскиот посестрински модел: 521 литри стандардно, 1.630 литри максимално (+24 литри). При доплата за поместлива задна клупа, просторот одзади може да варира меѓу 479 и 588 литри. Специјалноста на Karoq е можноста за отстранување на задните седишта, по што останува чист товарен простор со зафатнина од 1.810 литри.
„Помошник“ за паркирање, за следење лента или за појди-запри во колона може да се ангажираат, исто како и за систем за следење на мртвите агли или за самостојно запирање при опасност од судир. Максималната тежина на приколка изнесува точно два тона. И за тоа постои асистенција, за олеснување на возењето наназад при закачена приколка. Почнувајќи од нивото на опрема Ambition, како опција се нуди и диодно амбиентално осветлување, со избор на десет бои.
Пет мотори се нудат во компактниот кросовер на Skoda: 1.0 TSI (115 КС) и 1.5 TSI (150 КС), како и 1.6 TDI (115 КС) и 2.0 TDI (150 и 190 КС). Сите мотори доаѓаат стандардно со систем старт-стоп и повраток на енергијата при сопирање. Седумстепен менувач со двојна спојка може да се комбинира со сите мотори, истиот се вградува стандардно во верзијата со најсилниот дизел, којашто воедно располага и со погон на сите тркала. Посебност кај новиот 1.5 TSI е исклучувањето на дел од цилиндрите при пониско оптоварување, заради заштеда во горивото.
Премиерата на Skoda Karoq ќе се случи на 18-ти мај во Стокхолм, продажбата ќе стартува кон крајот на годината.