Дарко Јаконов
Skoda Eniaq веќе се тестира со слабо маскирана каросерија по јавни патишта и може да се насети основата на изгледот на електричниот СУВ-модел на Чесите, еден од десетте модели на струја до 2022 година.
Платформата MEB што ја користи Volkswagen ID.3, првиот модел од Волфсбург што ќе биде достапен само како електричен автомобил, служи како основа и за Skoda Eniaq. Идниот СУВ-модел на Чесите веќе го достигна завршниот стадиум од тестирањето на прототипите и се појавува во обичен сообраќај само со слабо маскирана каросерија.
Првите фотографии од „карпараците“ (од кар и папараци) откриваат дека каросеријата мошне верно ја следи силуетата на купе од концептниот автомобил Skoda Vision iV. Внатрешноста исто така ќе ја следи вообичаената шема на електричните автомобили, со голем средишен дисплеј. Кокпитот ќе биде сличен со оној во комбилимузинскиот ID.3, но со неколку измени во стилот на Skoda.
Конкретни детали околу погонската техника уште отсуствуваат, но се очекува дека Skoda Eniaq ќе има погон на сите тркала, со по еден електромотор на предната и задната оска
Во стилот на останатите модели од нова генерација, името на моделот ќе биде напишано со големи и одвоени букви на задниот капак, исто како кај Scala & Co. За изборот на името, Skoda веќе појасни дека истото е инспирирано од ирското име Ениа, коешто значи основа или принцип.
Името на следните електрични модели на Skoda исто така ќе почнува со „е“, додека во случајот на Eniaq, последната буква во името е во „шема“ со СУВ-моделите Kodiaq, Karoq и Kamiq.
Eniaq означува почеток на новото поглавје на чешката марка. Skoda планира до крајот на 2022 година да има 10 модели со електричен погон, во подмарката iV. Продажните очекувања се автомобилите на струја да достигнат удел од 25 проценти до средината на оваа декада. Влогот во електромобилноста на Skoda изнесува две милијарди евра.
Првиот електричен СУВ на Skoda се вика Enyaq
