146
19 shares, 146 points

Годинава за Škoda ќе мине во одбележување на важниот јубилеј. Повеќето од овие историски модели ги познаваме и од нашите улици и од соседството, дел од следниве автомобили на чешката марка многумина ги помнат и како семејни возила. Автомобили што во секој случај побудуваат убави сеќавања и дополнително означуваат важни историски поглавја на Skoda.

1905

LAURIN & KLEMENT VOITURETTE A

New photo by Automedia MK / Google Photos

Тоа е првиот автомобил од Млада Болеслав, како почеток на следното поглавје по успехот со велосипедите Slavia и мотоциклите Laurin & Klement. Моделот именуван L&K Voiturette A во тоа време беше моторизиран пристојно со својот двоцилиндарец во V со зафатнина од еден литар, со моќност од седум КС. Тоа беше доволно за 40 km/h. Историјата го помни овој автомобил по лесната управливост, возните својства и противвредноста. Моделите што се појавуваа со текот на годините добиваа само различна буква во ознаката.

1911

LAURIN & KLEMENT S

New photo by Automedia MK / Google Photos

Серијата модели S се произведуваше 14 години и се вбројуваше меѓу бестселерите, со продукцијата од преку 2.000 примероци. Благодарение на овој модел, Laurin & Klement своевремено станаа најголем производител на моторни возила во австроунгарската империја. Верзијата L&K Sg во 1913 година беше достапна во дури десет каросериски изведби, вклучувајќи докторска или доставна варијанта, како и дамско купе.

1925

LAURIN & KLEMENT/ŠKODA 110

New photo by Automedia MK / Google Photos

Во 1925 година, Laurin & Klement се здружи со најголемиот машински концерн и производител на наоружување во Централна Европа, гигантот Skoda од Плзен. Моделот L&K/Škoda 110 од тој преоден период се нудеше во цела низа варијанти, меѓу другото со тврд или платнен покрив. Идејата да се понудат два автомобила во еден беше реализирана со отстранливиот заден дел. На тој начин, оригиналниот автомобил се претвораше во пикап. Трговците можеа да го користат автомобилот за достава на стока во работната недела, за во неделите тој да се претвори во семејно возило, со место за сопругата и децата.

1934

ŠKODA SUPERB

New photo by Automedia MK / Google Photos

Кога компанијата бараше име за својот нов знаменосец во 1934 година, беше избрано Superb. Производството на Š 640 Superb со шестцилиндарски мотор започна во 1935 година. Како дел од ексклузивната опрема се вградуваше шестцевно радио или преграда од палисандер, за одвојување на местото за возачот од патниците, меѓу кои се вбројуваа политичари, дипломати и бизнисмени. Меѓу купувачите на ова возило спаѓаше и фирмата за обувки Bat’a од Злин, којашто произведуваше и гуми под истото име за моделите на Skoda.

1936

ŠKODA POPULAR Monte Carlo

New photo by Automedia MK / Google Photos

Во 1936 година, Škoda Popular втора ја мина целната линија на релито Монте Карло, во категоријата до 1,5 литар. Брзо потоа компанијата понуди спортски модел во купе или родстер изведба, во чест на големиот успех. Меѓу напредните технички решенија се вбројуваа лесната, но крута носечка рамка, независното водење на сите тркала и траксаксијалниот погон преку1 синџир, исто акко и елегантната каросерија со аеродинамична форма.

1959

ŠKODA OCTAVIA

New photo by Automedia MK / Google Photos

Škoda Octavia доби мошне звучно име. Оригинално, името потекнува од латинскиот јазик и означува „осма“, бидејќи Octavia беше осми модел на Škoda со прогресивна носечка рамка, но и осми модел по војната. Автомобилот се продаваше одлично, а на тоа се надоврзуваа и големи успеси на тршки трки и натпревари, вклучувајќи хет-трик на релито Монте Карло. Скандинавските возачи постигнуваа чуда со Octavia на снег и на мраз. Подоцна следеше и практичната изведба Combi, којашто се произведуваше до 1971 година.

1961

ŠKODA FELICIA

New photo by Automedia MK / Google Photos

Felicia беше сестрински модел на Octavia, со платнен покрив. Со доплата се испорачуваше и цврст повеќеслоен покрив, исто така отстранлив. Љубителите на брзината повеќе се решаваа за моќната изведба Super, со два карбуратори. Во 1950-те и 1960-те се произведоа вкупно 14.863 примероци. Felicia од крајот на продукцијата, денес е еден од најценетите ветерани на сцената на олдтајмери. Клубот со името на моделот, основан уште во 1960 година, уште е присутен на сцената.

1964

ŠKODA 1000 MB

New photo by Automedia MK / Google Photos

Во 1964 година пристигна сосем нова генерација модели, со четирицилиндарец назад и со погон назад. Како еден од најдобрите европски автомобили во класата до еден литар, од овој модел се произведоа речиси 443.000 примероци од „Ем-Бе“. Фирмата од Млада Болеслав се гордееше на алуминиумскиот блок на моторот кој беше лиен под притисок, како оригинален процес на чешката марка, исто како и на новоизградената фабрика со којашто значително се зголеми продукцијата. Покрај стандардната и помоќната изведба 1100 MB, се нудеше и варијанта со две врати MBX. Škoda продолжи со модели со заден погон до 1990-те години.

1970

ŠKODA 110 R + ŠKODA 130 RS rallye

New photo by Automedia MK / Google Photos

Елегантната Škoda 110 R coupé со седишта во конфигурација 2+2 беше дело на фабриката во Квасини во Источна Бохемија. За извоз заминаа преку 57.000 модели „R“. Впечатливата појава произлегуваше од линијата на покривот, од стилските средишни столбови и од вратите без рамка. На тоа следеа анатомски седишта, како и раскошен број инструменти на арматурната табла. Денес овој модел е меѓу најбараните од периодот на 1970-те. Врз основа на овој модел во 1975 година беше изработена уште една легенда од мотоспортот, Škoda 130 RS. Поради перформансите на рели и на тркачките патеки, RS доби прекар „Porsche од истокот“. Моторот од 1,3 литар постигнуваше моќност меѓу 140 и 183 КС, додека крајната брзина изнесуваше 220 km/h.

1987

ŠKODA FAVORIT

New photo by Automedia MK / Google Photos

Favorit донесе темелна промена во концептот на Škoda, од принципот „сé назад“ на „сé напред“. Со ослободувањето на простор за багаж назад и со вградувањето преклоплива клупа, се овозможи изведување на комби, а подоцна и пикап варијанта. Практичноста во секојдневието направи од овој модел да биде уште едно големо име во историјата на марката. Дизајнот беше потпишан од Bertone. Моделот се произведе во повеќе од еден милион примероци.

1996

ŠKODA OCTAVIA I

New photo by Automedia MK / Google Photos

Во 1996 година се појави првиот модел што беше целосно развиен како модел на концернот Volkswagen. На купувачите им се допаѓаше огромниот багажник, заедно со одличната противвредност. Како прв модел со каросерија контруирана со примена на CAD, Octavia се одликуваше и со висока безбедност. Дизајнот го изработе сопствен тим предводен од Дирк ван Брекел. Производството траеше до 2010 година, паралелно со моделот од втората генерација.

2016

ŠKODA KODIAQ

New photo by Automedia MK / Google Photos

По 40 години од историското поглавје со мултинаменската Trekka од Нов Зеланд, изработена врз основа на Octavia Super, беше претставен првиот член на новото семејство СУВ-модели на марката. Името Kodiaq доаѓа од крупна сорта кафени мечки во Канада. Багажникот е најголем во сегментот, но силна страна претставува и напредната електроника, особено системите за асистенција. По Kodiaq следеа уште два модели, Karoq и Kamiq.

2019

ŠKODA CITIGOᵉ iV

New photo by Automedia MK / Google Photos

Прв големосериски модел на Škoda со погон чисто на струја, со електромотор со 61 kW, батерија од 36,8 kWh и досег до 252 километри според новата норма.

2019

ŠKODA SUPERB iV

New photo by Automedia MK / Google Photos

Знаменосецот од третата генерација стана достапен и во варијанта iV, со плагин-хибриден погон со 218 КС и досег до 62 километри.

2019

ŠKODA OCTAVIA IV

Skoda Octavia nova
Skoda Octavia nova

Од 1959 година се произведоа повеќе од 6 милиони автомобили со моделското име Octavia. Во ноември започна новото поглавје, со моделот од четвтртата генерација. Моделот се достапен и во верзии со погон на метан, како и во плагин-хибридна варијанта.

2020

ŠKODA VISION iV

Концептот на кросовер со електричен погон Vision iV ќе премине во сериски автомобил во текот на годинава. За европскиот пазар, моделот ќе се произведува во матичната фабрика на Škoda во Млада Болеслав.

New photo by Automedia MK / Google Photos

Ти се допаѓа? Сподели со пријателите!

146
19 shares, 146 points
Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

0 Comments

Вашата адреса за е-пошта нема да биде објавена. Задолжителните полиња се означени со *