Дарко Јаконов
Престижните марки се подготвуваат да го освојат теренот. Rolls-Royce нема да отсуствува ниту од оваа трка. Неговиот теренец под развојно име Cullinan веќе се тестира на патиштата во маскирана каросерија.
Автомобилот од когошто ќе произлезе идниот теренски модел на Rolls-Royce веќе се тестира на патиштата. „Cullinan“ во моментов изгледа како несреќен проект на преамбициозен тјунер. Идниот модел е маскиран во екстремно скусена каросерија од Phantom Series II и главното тежиште во тестирањето е поставено на новиот погон на сите тркала, во комбинација со пневматска амортизација, под развојно име „Magic Carpet“.
Покрај благородната марка и некогашен снабдувач на британскиот кралски двор, теренски возила подготвуваат и Bentley, Lamborghini и Maserati. Моделот на Bentley го носи чудното име Bentayga, „суперспортскиот“ теренец на Lamborghini ќе се вика Urus, додека Maserati го потврди името Levante за идниот модел на висока нога.
Од фотографиите на тест-прототипот уште не може да се препознаат дизајнерските белези на Cullinan, поради тоа што изгледот на каросеријата во оваа фаза има само „провизорна“ улога, но може приближно да се претпостават пропорциите на теренецот, со значително покусо меѓуоскино растојание во споредба со Phantom. Секако дека теренските својства нема да бидат запоставени. Напротив, Cullinan ќе претендира во тој поглед да го надмине досегашниот „ролс-ројс на теренот“, Range Rover.
Точниот датум на претставувањето на серискиот модел уште не е познат, исто како и датумите за теренците на Lamborghini и Maserati. Кај Bentley веќе има подетални информации, односно информација: Bentayga ќе стартува со продажба веќе в година.
