Со близу половина милион продажби, Renault Kadjar е далеку од епизодист на СУВ-сцената. Моделот добива освежен изглед, поголем комфор и подобрен впечаток за квалитет
Kadjar се појави на пазарот од 2015 година, како поголем брат на бестселерот Captur и со едно својство што повеќето модели во сегментот на СУВ-компактите го запоставуваат – можност за избор на верзија со погон на сите тркала, развиен во соработка со партнерот и специјалист Nissan.
За три години, Renault Kadjar се продаде во повеќе од 450.000 примероци, на повеќе од 50-те пазари низ светот на коишто е достапен. Францускиот автомобил заслужи моделско освежување. Неколку подрачја во надворешноста се преработени за да оддаваат помодерна нота. Очекувано за Renault, се работело и на комфорот, а извршени се и неколку интервенции за да се стекне поубедлив впечаток за квалитетот на завршната изработка.
Renault Kadjar ja следи дизајнерската шема на Мegane и Captur
Светлата ја имаат вообичаената С-графика на моделите на Renault. Диодни трепкачи сега се интегрирани во дневните светла, а во повисоките нивоа на опрема и магленките користат диодна техника. Слични измени претрпеа и задните светла. Маската е поширока, со нови хромирани детали, браниците исто така се преработени.
Промените во кокпитот се најзабележливи во контролите за климата и во новиот дисплеј на допир, со пречник од седум инчи, што сега е во иста линија со арматурната табла. Ново топ-ниво на опрема е Black Edition, со седишта во алкантара, бандажи од 19 инчи и заштитни плочи напред и назад.
Французите извршија и неколку преправки во формата на седиштата, ја подобрија вентилацијата и додадоа неколку практични функции, како лизгање на потпирачот за рака напред.
Најважните промени сепак се во понудата од погонски единици. Renault Kadjar во основа гo добива 1,3-литарскиот TCe што веќе се вградува во Captur и Megane. Познавачите ќе се присетат дека тоа е заеднички мотор со Daimler и негова верзија се вградува во актуелниот Mercedes A-Class. Бензинецот е достапен во верзии со 140 и 160 КС, со мануелен менувач или со менувач со двојна спојка.
Соодветно на строгите актуелни норми за издувни гасови, дизелите во Renault Kadjar користат селективна каталитичка редукција (SCR) и се водат како Blue dCi – поради потребата од користење „АдБлу“, исто како сите дизели со чиста емисија. Blue dCi 115 доби 5 КС и 10 Nm во споредба со претходната верзија на моторот, а над него е позициониран Blue dCi 150, со дополнителни 20 КС во споредба со претходникот. Посилниот мотор се испорачува со мануелен менувач и достапен е 4х2 и 4х4-верзии, наспроти „dCi 115“ кој подоцна ќе биде достапен и со менувач со двојна спојка.