Renault и Dacia со историски рекорд од 3,8 милиони продадени возила

Ланската година беше рекордна за марките од групацијата на Renault со 3,76 милиони продадени возила. Во резултатот влегуваат и продажбите на Dacia и на лесните доставни возила.

Групацијата Renault ја заврши ланската година со рекордни 3,76 милиони продадени возила низ светот. Во споредба со преклани, продажбата забележала зголемување од 8,5 проценти, односно продадени се 293.500 возила повеќе. Во резултатот влегуваат и продажбите на романската марка Dacia, на руската Lada, како и на лесните доставни возила од марките во групацијата.

Renault држи четири проценти од светскиот пазар (преклани 3,8 проценти). Француската марка е втора по продажба во Европа, но затоа убедливо го држи лидерското место на пазарот на електрични возила, со раст од дури 38% и пазарно учество од близу 25 проценти. Само Zoe има за 44% зголемена продажба, што се должи првенствено на вградувањето нов батериски пакет со поголем капацитет. Clio е втор најпродаван модел на европскиот пазар, додека Captur е лидер меѓу кросоверите во својата класа.

Dacia лани пораснала за 11,7% со повеќе од 450.000 продадени возила

Од марката Renault се продадени вкупно 2,67 милиони патнички автомобили и доставни возила, Dacia постигнала 655.235 продажби. Романската марка ја постигна историски најголемата продажба во Европа, со раст од 11,7% и вкупно 463.712 возила. Рекорд имаат и доставните возила од групацијата, со 462.900 продадени примероци и зголемување од 4,1 проценти.

Руската Lada постигнала плус од 17,8 проценти, со 336.600 продадени возила. Единствено јужнокорејскиот Renault Samsung Motors има послаба продажба, со близу 100.000 возила или за 10% помалку во споредба со преклани. Во 2018 година се очекува раст на глобално ниво од 2,5 проценти.

Топ 15 пазари за марките од групацијата Renault лани