Дарко Јаконов
Врз основа на Rapid Spaceback, 26 практиканти во Skoda ја изработија купе-изведбата Atero. Моделот нема да доживее сериско производство, иако би прилегал одлично во понудата на чешката марка.
Практиканти во фабриката во Млада Болеслав досега имаат изработено два модела за Skoda, кабриолетот CitiJet на база на Citigo и пикапот Funstar изведен од Fabia. Сега доаѓа и третиот „студентски“ автомобил, купе кое што како основа го користи Rapid Spaceback и доби сопствено моделско име, Atero. Дваесет и шестмина практиканти во чешката марка работеа на овој проект, прикажувајќи ја на дело својата технолошка ексертиза и вештината на рачната изработка.
Работата на уникатниот Atero започнала кон крајот на минатата година, со поддршка од одделенијата за технички развој, дизајн и производство во Млада Болеслав. Вкупно 1.700 часови биле потребни за комплетирање на овој единствен проект. Преправката од комби со пет врати во купе со две врати беше подрастична во споредба со претходните проекти на студентите во Skoda. Средишните столбови се поместени поназад, задните столбови се поставени под поблаг агол, а соодветно на тоа е сменета и линијата на покривот. Секако дека и вратите се продолжени во споредба со стандардниот модел.
Рачно перфорирани сопирачки дискови за „студентскиот“ автомобил на Skoda
Студентите додадоа и отвори за воздух во хаубата, заден спојлер, нови задни светла, го презедоа и издувниот систем од Skoda Octavia RS и соодветно ги модифицираа предниот и задниот браник. Моторот е 1,4-литарски TSI со 125 КС во комбинација со 7-степен менувач со двојна спојка. Бандажите од 18 инчи се преземени од Skoda Octavia, лакирани се во црна боја и изведени се со црвени ленти. Зад предните бандажи ѕиркаат мануелно перфорирани сопирачки дискови.
Каросеријата е во црна боја со бисерен ефект, додека спојлерите, праговите и детали од каросеријата се лакирани во црвена боја. Кабината исто така не е оставена нечепната. Внатре е изведено амбиентално осветлување со диодни светла во црвена боја, надополнето со озвучување од 1,8 киловат и 14 звучници.
[FAG id=24445]
