Корона-пандемијата и во мај предизвика голем пад во продажбата на автомобилските пазари ширум светот, исто како во март и април. Во Европа (ЕУ 27, ЕФТА и Велика Британија), пазарот се скусил за повеќе од половина, а за околу една третина се смалил пазарот во САД. Во Кина, каде што беа повлечени голем број од мерките против ширењето на корона-вирусот, по блису две години повторно е забележано зголемување на продажбата на автомобили.
Во Европа во мај биле регистрирани 623.800 нови патнички автомобили или за 57% помалку од истиот месец лани. Петте најголеми пазари и натаму имаат драстичен пад, но не во историски рекордна мера како во април. Во Германија (-49 проценти), Франција (-50 проценти) и Италија (-50 проценти) новите регистрации се преполовиле во мај. Во Шпанија, пазарот се скусил за речиси три четрвтини (-73%). Најголем минус има Велика Британија, со само 20.200 нови возила во мај (–89%). На европскиот автомобилски пазар во првите пет месеци се продадени вкупно 4,0 милиони возила или за 43% помалку од истиот период лани.
Кинескиот пазар првпат по подолго време бележи раст. Со 1,6 милион продадени нови возила, пазарот во минатиот месец таму се зголемил за 6 проценти. Билансот од почетокот на годината покажува 6,0 милиони возила, односно минус 27 проценти.
Пазарот во САД во мај имал пад од 30 проценти, вклучувајќи ги и пикапите. Вкупно се продадени 1,1 милион возила. Продажбата на патничките автомобили се намалила за 44%, додека кај пикапите и СУВ-возилата минусот е 24 проценти. За пет месеци, во САД се продадени 5,3 милиони возила или 23% помалку од истиот период лани.
Јапонскиот пазар регистрирал 174.400 патнички автомобили во мај или 47% помалку од лани. Тоа е најниска месечна продажба во последните девет години. До мај во земјата се продадени повеќе од 1,5 милион возила, што е за една петина помалку од периодот од јануари до мај лани.