Porsche 911 R е „највозачки“ автомобил според британскиот Autocar

Во магазинот Autocar по 28-ми пат се гласаше за најдобриот спортски автомобил на годината. Шест уредници ги тестираа финалистите на тркачка патека и на обичен пат за да оценат кој е автомобилот што причинува најголемо задоволство за возачот. Победата ја понесе Porsche 911 R, меѓу другото и поради спојот на врвни возни својства и перформанси со возливост во секојдневието.

Носителот на титулата за најдобар спортски автомобил годинава се решаваше во најтесната завршница во близу тридецениската историја на изборот на британскиот магазин Autocar. Шест уредници на магазинот, во обемно тестирање на кандидатите на 3,4-километарската тркачка патека Енглси, како и по обични патишта во северен Велс, за победник го избраа Porsche 911 R, кој со 277 бодови и предност од осум бодови ги остави зад себе Ferrari 488 GTB и McLaren 675LT Spider.

Вкупно единаесет спортски автомобили се бореа за титулата, вклучувајќи ги Honda NSX и Aston Martin Vantage GT8, но и „народските“ Ford Focus RS или BMW M2. Во изборот на Autocar сепак не решаваат коњските сили или цената на моделите, туку пресудно е возачкото задоволство, иако обично моделите со најмногу коњски сили успеваат најдобро во тоа.

Ferrari и McLaren во тесна битка за второто место

Секој од уредниците доделува до 50 бодови за секој автомобил, до 25 за однесувањето на возилото на тркачка патека и до 25 за својствата во секојдневно возење. Повеќе автомобили може да добијат исто бодови, но вкупниот број на бодови што им стои на располагање на уредниците е ограничен, заради избегнување нерешен резултат. Но, токму тоа се случи годинава: Ferrari 488 GTB и McLaren 675LT Spider завршија на второто место со ист број бодови. Италијанскиот болид сепак е тој што повеќе ги убеди експертите на британскиот магазин.

За победникот, Autocar пишува: „Porsche 911 R е потактилен и покомуникативен од Ferrari, потеатрален и поенигматски од McLaren, без какви било забелешки за динамичката изведба или за приспособливоста, 911 R се темели и врз квалитетите што придонесоа за долготрајната популарност на серијата 911.“

Времето на круг не решава за победниците во изборот на Autocar, туку уживањето за возачот. Но, како што наведува магазинот, „фактот што повисоко пласираните автомобили се меѓу побрзите на 3,4-километарската патека, потврдува дека управливоста, контактот со подлогата, балансот и прецизноста што придонесуваат некој автомобил да биде брз, придонесуваат тој да биде и возбудлив.“

Табелата со измерените времиња на круг сепак носи неколку изненадувања. Porsche 718 Boxster постигна многу подобро време од некои поскапи и побрзи модели од него, додека Honda NSX не ги убеди уредниците на Autocar со возните својства во свијоци. Производителите сами решаваат со какви гуми ќе ги испратат возилата на тест. Според магазинот, тркачките гуми им донесоа предност од секунда до две на McLaren 675LT и 570S, Porsche 911 R, BMW M4 GTS и Aston Martin Vantage GT8.